Recent Posts

Breaking News

Milala'g tuba nasamdan ang baba


MATANAO, Davao del Sur -- Lockdown sud sa selda sa Matanao Municipal Police Station ang usa ka lalaking hubog kinsa gihapak niini og baso ang iyang kainom og tuba (coconut wine) didto sa Barangay La Suerte alas otso sa gabii, Lunes, Mayo 25.

Sa imbestigasyon sa kapolisan, nasayran nga pulos milala og tuba ang manag-silingang sila si Archie Camallere Sesuelos ug Ofreglien Malajon Gregorio didto sa Purok Orchids sa lugar.

Apan, kalit nagkabikil ang duha samtang gatagay, hinungdan nga gibali ni Ofreglien ang sigarilyo ni Archie, hinungdan nga mibalos kini ug gihapak og baso ang silingan.

Ang insidente miresulta sa pagkasamad sa baba ug dughan ang uwahi.

Daling miresponde ang kapolisan human nakadawat og taho gikan sa mga opisyal sa barangay nga aduna'y nahitabong kaguliyang sa lugar, samtang gidala sab sa bay tambalanan ang nasamdang si Ofreglien aron dapatan og medikasyon.

Gitakdang mobayad og multa ngadto sa Treasurer's Office sa munisipyo ang sad-ang hubog ug mohimo sab kini ug lima ka adlaw'ng community service sa ilang barangay. (Orlando B. Dinoy)


Source: Sun.Star Superbalita (https://www.sunstar.com.ph/article/1857832/Superbalita-Davao/Balita/Milalag-tuba-nasamdan-ang-baba?ref=rss&format=simple&link=link)

No comments