Recent Posts

Breaking News

Mga Sugboanon nga natanggong sa Negros sa Samboan sugaton


MAHIMO na nga makapauli ang tanan nga mga Sugboanon nga na stranded sa Negros Oriental human naabtan sa lockdown.

Mao kini ang gipahibawo sa lokal nga kagamhanan sa lungsod sa Samboan pinaagi sa official facebook page niini sa Mayo 25, 2020.

"This is for locally stranded individuals. This is for those permanent residents of an LGU who want to return home, by reason or another were stranded in Negros Oriental."

Aron nga makapauli kinahanglan lang nga mokuha sa mga mosunod nga rekisitos:

Una mao ang travel authority nga gi-isyu sa opisina sa kapulisan sa Probinsya sa Negros Oriental (NegOr);

Ikaduha, kinahanglan nga mopaubos una sa rapid test o ba kaha swab test ug dad-on ang coronavirus disease (covid-19) certificate. Kini pagpamatuod nga negatibo ang resulta.

Kon wala niini, mahimong makapangayo og medical certificate sa Philippine Health Office sa probinsya nga magpamatuod nga wala kini nakahimamat sa mga positibong kaso, suspected, ug probable.

Isip protocol sa probinsya sa Sugbo, kinahanglan nga dunay coordination certificate ug pahibaw-on daan ang lokal nga kagamhanan nga paingnan niini.

Kinahanglan ilatid sa maong certificate ang barangay ug sitio sa panimalay niini, paagi aron masusi daan sa LGU kon residente ba gyud kini sa lugar.

Ang LGU lang ang mopadala og sakyanan alang sa maong pasahero nga mag-atang sa pantalan sa Samboan. Dili usab pwede ang pribado nga sakyanan.

Kon walay mokuha nga sakyanan sa LGU, dili tugotan nga makasakay sa barko ug dili usab makapauli.

Usa lang ka barko ang gitugotan nga maka byahe matag adlaw. Mogikan kini sa pantalan sa Tampi sa alas 12:30 pm ug modunggo sa pantalan sa Matiao, Samboan.

Gipasidan-an ang mga pasahero nga ang plitehan sa pagpauli, kaugalingon nila kining gasto.

Ang mga pasahero nga residente sa Samboan gimandoan sa pagpaubos sa 14 ka adlaw nga kwarantinas samtang ang uban nga pasahero gikan sa laing LGU kinahanglan nga mosubay usab sa health protocols ug guidelines nga gipatuman sa ilang lungsod. (ANV)


Source: Sun.Star Superbalita (https://www.sunstar.com.ph/article/1857848/Superbalita-Cebu/Balita/Mga-Sugboanon-nga-natanggong-sa-Negros-sa-Samboan-sugaton?ref=rss&format=simple&link=link)

No comments