Recent Posts

Breaking News

Mass testing giawayan sa 2 ka opisyal


DUHA ka tag-as nga mga opisyal sa administrasyon ni Mayor Edgardo Labella nagbasulay sa palpak nga mga mass testing sa coronavirus disease (Covid-19).

Unang nagkasukliay og mga pamahayag sa Covid-19 swab testing sila si City Administrator Floro Casas Jr. ug City Health Department head Dr. Daisy Villa sa testing sa mga pasyente sa Barangay Luz Elementary School.

Ang mga pasyente nga asymptomatic ninglapas na sa 14 ka adlaw nga quarantine.

Si Casas nipahibawo sa media nga 100 sa mao nga mga pasyente mogawasay na human mag-negatibo sa unang tests.

Naghuwat na lang sila sa ikaduhang test nga maoy confirmatory.

Apan nahibaw-an nga wa pay bisan usa nga na-test sa mga pasyente.

Niadto lang Mayo 7, 2020 na-test ang 69, di ang 100.

Nangatarungan si Casas nga mao kini ang iyang nasayran gikan sa CHO.

Matod ni Casas nga nagpaabot siya nga sundon ni Villa ang procedure.

“That on May 7, 2020 asymptomatic patients with negative results (which could already be about 100 patients) will be released from Barrio Luz BIC. This was the basis of my statement before the Cebu City Council,” pasabot ni Casas sa iyang Facebook post.

Nagkanayon si Casas nga gusto sa Siyudad nga makita sa katawhan nga bisan tuod nisaka ang gidaghanon sa mga kaso sa Covid, nisaka usab ang mga survivor.

Ang mao mga pasyente lapas na unta kaayo sa quarantine period busa angay nang papaulion sa ilang komunidad.

Basulay

Ang ikaduha mao ang nagpadayon nga mass testing sa kabarangayan, nga gihulagway ni Villa nga di Covid test, kon di blood extraction lang.

Si Villa nireklamo nga wa siya maapil sa pagplano sa mass rapid testing.

Tipik ang testing sa Project Balik Buhay (PBB_.

“I was not involved from the start... I was not informed,” sulti ni Villa atubangan sa Cebu City Council sa Biyernes, May 8, 2020.

Sugdan unta ang rapid testing sa Mayo 4, apan giuswag kini ngadto sa Mayo 6.

Si Labella nakigtagbo sa health officials niadtong Mayo 3 aron tukion ang rapid testing.

Ang rason nganong kini giuswag tungod kay siya nidumili, atol sa meeting, human sa daghang mga kalibog gikan sa mga barangay kapitan.

“I said it will be unfair for me because I was asked by a lot of barangay officials what are the protocols, yet I cannot answer because I don’t know,” pagpasabot ni Villa.

“Unta hatagan ta’g chance to speak up... maong wa nako nianha (meetings) kay daghan kaayo’g doctors who came in even if dili sila doctors. Nagpakahilom ko but I was pushed to my limit. Kon naay bati ako’y ma-blame,” matod ni Villa.

Kuha rag dugo

Giklaro usab ni Villa nga ang gihimo sa City Health Department mao ang pagkuha og dugo, di testing.

“Ako lang klaruhon, we cannot do the testing, I will not allow the testing if the testing kit is not FDA-approved and not validated by the RITM. We are not trained to do the testing,” siya nipasabot sa Konseho.

Ang ilang gibuhat karon sa mga barangay mao ang “massive blood extraction,” nagkanayon si Villa.

Human sila magkuha sa dugo, ang samples ipadala ngadto sa Regional Epidemiology and Surveillance Unit (Resu).

Human sa Resu, ipadala kini sa mga laboratory sa mga pribadong ospiyal nga maoy mopahigayon sa testing ug reading, pasabot ni Villa.

Kon duna nay mga resulta, ibalik kini sa CHD, matod ni Villa.

Tubag ni Casas

Si Casas niangkon nga si Villa wa maapil sa pagplano sa Project Balik Buhay.

Apan matod ni Casas nga ang wa gisulti ni Villa nga ang wa pagkaapil niya mao ang iyang kapakyas sa pagtambong sa mga tigom.

Matod ni Casas nga kon tawagan si Villa, kanunay kini nga busy sa field sa mga testing sa mga barangay.

Si Casas niingon nga di kini gimbuhaton ni Villa isip pangu sa iyang departamento.

“As health officer, it is the job of Dr. Villa to formulate plans, policies, guidelines and coordinate actions to address this public health emergency, not collect swabs,” dugang ni Casas.

Si Casas niingon nga di unta siya motubag nga agi sa publiko, apan iyang nakita ang panginahanglan kay di siya makatugot nga maoy himuong lusot sa kapakyas ni Villa.

Si Labella, sa iyang bahin, niingon nga nahilot na ang kasungian nila ni Casas ug Villa.

Iya kining gihulagway nga “miscommunication” atol sa teleconference sa city hall.

Konseho

Si Cebu City Councilor Raymond Alvin Garcia, kinsa nirepresenar sa public sector sa PBB, niingon nga dunay mga doktor gikan sa Department of Health (DOH) atol sa planning sa PBB.

Sa pangangkon ni Villa nga wa siya maapil sa plano, si Garcia, atubangan sa Konseho nga nag-session, niingon nga naa si Michelle Linsalata, usa ka doktor sa CHD, nitambong sa mga tigom ug siya nagtuo nga nagrepresentar kini sa CHD.

Si Garcia nitubag sa mga pagsaway nga ang Siyudad way mga plano kalabot sa Covid-19.

“Magsige mo’g ingun ngano ni ngano ni ngano na. Unsa ma’y inyong plano? Naa moy plano? Wa man mo’y plano. Prangka nga pagkaestorya, wa mo’y plano,” sulti ni Garcia atubangan sa Konseho. (JJL, REV)


Source: Sun.Star Superbalita (https://www.sunstar.com.ph/article/1855762/Superbalita-Cebu/Balita/Mass-testing-giawayan-sa-2-ka-opisyal?ref=rss&format=simple&link=link)

No comments