Recent Posts

Breaking News

Mama gipatay sa anak; quarantine pass hinungdan?


ANAK nga seaman nga giingong naburyong na kay wa makasakay og barko niluba patay sa iyang inahan mga pasado alas 7 sa gabii sa Huwebes, Mayo 7, 2020 sa Ybanez compound, Barangay Mambaling, Dakbayan sa Sugbo.

Ang inahan ug anak gikataho nga nagkaaway sa miaging semana kabahin sa quarantine pass nga gikuha sa anak.

Si Police Captain Francis Renz Talosig, hepe sa Mambaling Police Station nga nahinabi sa Superbalita Cebu, niingon nga napalgan sa e-biker nga si Richard Gutang ang biktimang giila nga si Anelita Andoque nga naglunang sa dugo sud sa giabangang apartment.

Naalerto si Gutang human iyang nakita sa gawas sa apartment si Johnrey Bacsal, 25, anak ni Andoque, nga nagkadugo gikan sa nawong hangtod sa tibuok lawas.

Si Gutang nangutana kang Bacsal, apan way klarong tinubdagan.

Nigawas si Bacsal sa compound.

Nisulod si Gutang aron unta pahibaw-on ang inahan, apan iyang nakaplagan si Andoque nga nagkadugo ug patay na.

Ang liog niini dunay ginulgolan.

Daling giapas ni Gutang si Bacsal ug gipahibawo ang mga tanod ug mga sakop sa Tau Gamma Phi nga nagbantay sa barangay control point.

Nisukol unta si Bacsal, apan gitabangan na siya og kupot sa mga bantay.

Ilang gi-turnover si Bacsal sa Mambaling Police Station.

Matod ni Talosig nga ang banay nisulti kanila nga ang inahan ug anak nagkaaway tungod sa quarantine pass.

Giingong nasuko si Andoque nga gikuha ni Bacsal ang pass.

Sukad niadto, giingong si Bacsal naa lang kanunay sa iyang kuwarto, wa nay gawas gawas.

Imbestigahon pag maayo sa kapulisan ang mga kabanay. (GPL)


Source: Sun.Star Superbalita (https://www.sunstar.com.ph/article/1855585/Superbalita-Cebu/Balita/Mama-gipatay-sa-anak-quarantine-pass-hinungdan?ref=rss&format=simple&link=link)

No comments