Recent Posts

Breaking News

Mahimo nang makatambong og misa


GITUGOT na sa Archdiocese of Cebu ang pagpahigayon og misa, bunyag, kompisal ug kasal sa mga lugar nga anaa na sa general community quarantine (GCQ) o modified community quarantine (MCQ).

Apan limitado gihapon ang makatambong.

Si Archbishop Jose Palma niisyu niadtong Mayo 25, 2020 og usa ka protocol alang sa mga relihiyuso nga serbisyo.

Sa maong protocol, aduna nay ipahigayon nga misa sa mga simbahan, apan wa malakip ang mga lugar nga anaa pa sa enhanced community quarantine (ECQ) ug modified enhanced community quarantine (MECQ).

Aduna usab bag-o nga sxhedule sa misa ug kinahanglan gamay lang nga mga tawo ang motambong.

Padayon gihapon ang livestreaming sa mga misa alang sa mga tawo nga di makaadto sa simbahan tungod kay anaay gipangbati sa lawas.

Mga lagda

Kinahanglan usab nga anaay mga foot bath ug hand sanitizer sa pasulod ug pagawas sa simbahan. Gipahimangnuan usab ang mga manimbahay nga magsul-ob og mask kon moapil sa misa. Giawhag usab sa Archidiocese nga mas maayo adunay motan-aw sa temperatura sa mga maninmbahay.

Sa pagbunyag, ang ginikanan sa bata ug usa ka paresan nga magkugos ra ang tugotan nga makaapil sa seremonyas.

Samtang sa pagpangumpisal, kinahanglan usa ka metro ang distansya sa mangumpisal ug pari, silang duha magsul-ob og mask.

Mga simple lang nga kasal ang pwede karong tuiga.

Ang mga duol nga pamilya sa kaslon lang ang pwede makatambong, apil ang usa ka set sa principal sponsor.

Di gihapon pwede ang paghalok sa mga imahe ug kinahanglan usab nga i-disinfect ang simbahan. Matod sa Archdiocese nga kinahanglang magkat-on sa pagsagop sa bag-ong pamaagi sa “new normal.


Source: Sun.Star Superbalita (https://www.sunstar.com.ph/article/1857866/Superbalita-Cebu/Balita/Mahimo-nang-makatambong-og-misa?ref=rss&format=simple&link=link)

No comments