Recent Posts

Breaking News

LTO mipasidaan sa publiko


NIPAHIMANGNO ang Land Transportation Office (LTO) sa publiko bahin sa mga indibidwal sa social media nga nagtanyag nga mo-facilitate sa renewal sa driver’s license nga dili kini awtorisado sa ilang ahensiya ug ilegal.

Una sa tanan, sirado ang ilang buhatan sa LTO sa mga dapit nga gipaubos sa enhanced community quarantine (ECQ).

Ang LTO Central Office niluwat og pahibalo sa publiko nga dili motuo niining mga tanyag sa Facebook o ubang social media nga daw maka-renew sa mga driver’s license.

“The office of the undersigned has received verified reports on unscrupulous individuals who through social media platforms, such as Facebook, offer their services to facilitate the application for and/or renewal of driver’s licenses,” tipik sa notisya ni Edgar Galvante, assistant secretary sa Land Transportation Office.

Matod ni LTO 7 Regional Director Victor Caindec nga daghan na sila nga namonitor bisan sa Central Visayas kabahin niini nga modus.

Ilaha na usab kining gipaubos sa imbestigasyon aron masuta kon kinsa ang mga nagpaluyo niini.

“Pirmi man ta ga-investigate ani sa Cebu, usually mga online ni,” si Caindec nagkanayon.

Mag-atubang og falsification of public documents ang mosuway pagbuhat niining illegal nga binuhatan, “Sa LTO, if found in possession of a fake license, you will no longer be eligible for an LTO license,” si Caindec nagkanayon.

Subay usab niining mga licensing offices nga sirado, gipahibawo sa LTO nga pabilin nga valid kadtong driver’s license nga na-expire atol sa Enhanced Community Quarantine.

Kini nagpasabot kon ni-expire inyong lisensiya niadtong Marso ug Abril, ug ning Mayo, mamahimo ra kining magamit karon nga sirado ang mga buhatan sa LTO.

Naglakip nga valid ra gihapon gamiton kining mga na-expire usab rehistrasyon sa sakyanan atol sa pagpatuman sa ECQ. (HBL)


Source: Sun.Star Superbalita (https://www.sunstar.com.ph/article/1855660/Superbalita-Cebu/Balita/LTO-mipasidaan-sa-publiko?ref=rss&format=simple&link=link)

No comments