Recent Posts

Breaking News

Laing 10 ka mga pulis sa CCPO gi-quarantine


(UPDATED) Nakuhaan na sab ang mga sakop sa Cebu City Police Office (CCPO) nga gikinahanglan unta kaayo panahon sa pagpatuman karon sa enhanced community quarantine (ECQ).

Kini human nga laing 10 ka mga pulis nga nahisakop sa duha ka mga police station gipang-quarantine human ang ilang mga dinakpan sa illegal drugs positibo sa coronavirus disease (Covid-19).

Upat ka mga pulis sa Parian police station gipaubos ss isolation human masuta nga ang asawa sa ilang nadakpan positibo sa Covid-19.

Gikompirmar ni Police Brigadier General Albert Ignatius Ferro, hepe sa Police Regional Office-Central Visayas, nga naa karon sa usa ka tunghaan nga sakop sa ilang hurisdiksyon ang mao nga mga pulis.

Bisan kon way gipamati ang mao nga mga pulis, gipakuhaan gihapon kini niya og swab sample aron maneguro.

Lakip sa gi-isolate ang dinakpan sa kalapasan sa Republic Act 9165 kun Comprehensive Dangerous Drugs Act of 2002.

Samtang laing unom ka mga pulis gipang-quarantine sa usa ka tunghaan sa Barangay Tejero.

Ang unom gi-isolate human masayri nga ang bana sa babaye nga taga Tejero nga ilang nadakpan sa illegal drugs positibo sa Covid-19.

Matod ni Police Capt. Miles Damuslog, hepe sa Waterfront Police Station nga nahinabi sa Superbalita Cebu, human nila nahibaw-an nga positibo ang bana sa ilang dinakpan, iya dayon nga gipa-swab test ang asawa.

Iyang gipaapil sa swab tests ang iyang unom ka mga sakop sa Drug Enforcement Unit (DEU).

Ang lakang agi og panagana lang kay basin dunay nataptan sa novel coronavirus sa iyang mga sakop nga nakadakop sa drug personality.

Sa miaging semana, ang 54 sa 58 nga ginsakpan sa Sawang Calero Police Station gipang-isolate usab human nga duha nila ka mga dinakpan sa illegal drugs positibo sa Covid-19.

Ang laing upat ka mga sakop sa police station wa maapil kay naa sa mga barangay checkpoint na-assign.(BBT/AYB)


Source: Sun.Star Superbalita (https://www.sunstar.com.ph/article/1855728/Superbalita-Cebu/Balita/Laing-10-ka-mga-pulis-sa-Cebu-City-Police-Office-gi-quarantine?ref=rss&format=simple&link=link)

No comments