Recent Posts

Breaking News

Kausaban sa rota sa tricycles sa Lapu-Lapu giplano sa konseho


NUNOT sa kasamtangang gipatuman nga general community quarantine (GCQ) sa dakbayan sa Lapu-Lapu, ang konseho nagplano nga usbon ang rota sa tricycle.

Usa sa tumong mao nga malikayan ang posibilidad sa pagdoble og sakay sa mga trabahante sa tricycle hilabi na nga mahal na ang plite nga inisyal nga nauyonan sa konseho, tricycle operators ug sumasakay atol sa public hearing kalabot.

Matod ni Konsehal Flaviano Hiyas, ang majority floor leader sa konseho nga atol sa public hearing, dunay mitiyabaw sa kamahal sa plitehan nga P15 ngadto sa P25 depende sa gilay-on.

Kini gumikan kay adunay mga dapit sa dakbayan nga dawat-dawat ang biyahe sa tricycle.

Sa pagkakaron, ang mga tricycle adunay limit nga lugar nga mahimo silang makabiyahe sanglit lainlain usab sila og hurisdiksyon.

Pasabot niini ang ubang sumasakay kaduha mosakay padulong sa ilang trabahoan ug pauli sa ilang panimalay nga moresulta sa pagka doble usab sa ilang pletihan kada adlaw.

Nakita kini ni Hiyas nga balido nga rason alang kaniya ug usa sa iyang nakita nga posibleng solusyon niini mao ang pagbutang ug rota sa tricycle nga makalahos-lahos na sa ubang dapit sa dakbayan sukwahi sa kasamtangang lagda aron makadaginot ang usa ka pasahero.

Ang kagamhanan maoy gitugotang mo regulate sa biyahe sa mga tricycle sa dakbayan. "Legitimate man sad siya nga concern labi na gyud among pagtan-awon nga naay mga tricycle nga mag trip-cutting. Ilang iputol ilang biyahe para madoble ang bayranan sa mga pasahero. Mao nay pagatan-awon namo sa among deliberation kon unsaon namo na pagpangita og paagi. Sa dunay concern, antos-antos lang sa gyud ta," matod ni Hiyas. (GCM)


Source: Sun.Star Superbalita (https://www.sunstar.com.ph/article/1858137/Superbalita-Cebu/Balita/Kausaban-sa-rota-sa-tricycles-sa-Lapu-Lapu-giplano-sa-konseho?ref=rss&format=simple&link=link)

No comments