Recent Posts

Breaking News

Gwen mipasidaan sa provincial, district hospitals sa Sugbo


MGA doktor nga naa sa mga ospital nga gidumala sa Cebu Provincial Government giawhag sa paghunong sa pagpadala sa ilang mga pasyente sa dakbayan sa Sugbo, labina sa mga kaso nga pwede lang sa ilang sa pagtambal.

Si Gobernador Gwendolyn Garcia nipahibawo niini atol sa iyang tigom sa mga doktor sa Cebu Provincial Hospital sa Bogo City niadtong Biyernes, Mayo 22, 2020.

Usa sa gituki mao ang nagkadaghang mga pasyente sa coronavirus disease 2019 (Covid-19) sa mga ospital sa dakbayan.

Pipila ka mga pasyente sa northern Cebu gikataho nga nagpositibo sa Covid-19 human sila gidala sa mga ospital sa dakbayan sa Sugbo.

Usa ka pasyente, nga gikan sa lungsod sa Madridejos, gidala sa Vicente Sotto Memorial Medical Center (VSMMC) diin siya nanganak. Nagpositibo siya sa Covid-19.

Usa ka pasyente sa lungsod sa Carmen, kinsa naaksidente sa motorsiklo, gidala usab sa VSMMC nagpositibo dihang gikuhaan sa swab sample samtang na-admit.

Aron malikayan nga matakdan sa Covid-19 sa ospital, gimandoan ni Garcia ang mga doktor sa provincial ug district hospitals sa paghimo og minor operations lakip sa caesarian delivery.

"Referrals should be those cases which are beyond our capacity. I pity the poor who are brought here (in Cebu City) and might contract the novel coronavirus. That could mean three times more than what their original hospital bill was," matod ni Garcia sa Sugbo News report.

Matod ni Garcia, wa makapawagtang sab kini sa mga kabalaka sa mga tawo sa probinsya nga gikan sa Dakbayan diin nagagikan ang labing daghang kaso sa tibuok Sugbo.

Ang gobernador nidugang nga kadto lang nagpakita og mga simtomas sa Covid-19 ang i-swab gamit ang real-time polymerase chain reaction.

"We're going to have symptoms-based test. That’s with the blessing of Department of Health 7 Director Jaime Bernadas. He agrees with me,” matod ni Garcia.

Makigtagbo usab si Garcia sa mga pangulo sa upat ka provincial hospitals sa mga siyudad sa Carcar, Danao ug Bogo ug lungsod sa Balamban. (RTF)


Source: Sun.Star Superbalita (https://www.sunstar.com.ph/article/1857701/Superbalita-Cebu/Balita/Gwen-mipasidaan-sa-provincial-district-hospitals-sa-Sugbo?ref=rss&format=simple&link=link)

No comments