Recent Posts

Breaking News

Guwardya namusil og 2 kauban, 'naghikog'


GUWARDYA giingong naghikog human gipamusil ang duha ka kaubang guwardya, nga niresulta sa kamatayon sa usa, sa ilang security agency nga nahiluna sa Manuel Lim and Sons Building sa A.S. Fortuna St., Mandaue City alas 8:40 sa buntag adlawng Huwebes, Mayo 28, 2020.

Ang duha ka biktima mao si Jessie Liza, 31, guard-on-duty, ug si Benedicto Sumagang, usa ka retired Philippine National Police operation officer, kinsa usa sa namatay.

Sigon ni Police Captain Troy John Lalamunan, hepe sa Casuntingan Police Station, human sila makadawat og alarma nga adunay shooting incident sa maong lugar, miresponde dayon sila kuyog ang Special Weapons and Tactics team.

Pag-abot sa lugar, nakita nila si Liza nga anaa sa ground floor sa building nga samdan ug padulong na nga ihatod sa balay tambalanan.

Samtang sa ikaduhang andana sa maong building, si Sumagang nakit-an nalang nga wala nay kinabuhi nga nag-akbo sa usa ka computer unit.

Nakit-an sab ang suspek nga naghigda sa iyang kaugalingong dugo ug wala nay kinabuhi.

Sigon ni Lalamunan nga wala pa nila mailhi ang suspek tungod nag-mask kini.

Sa ilang inisyal nga imbestigasyon, nagtrabaho kini isip usa ka guwardya sa maong agency tungod nagsul-ob kini og black long sleeve nga adunay logo sa maong ahensya.

Gituohang naghikog ang maong suspek human kini niya pamusila ang mga kauban.

Matod pa ni Lalamunan nga wala pa nila masuta ang motibo sa maong pagpamusil. (KFD)


Source: Sun.Star Superbalita (https://www.sunstar.com.ph/article/1858067/Superbalita-Cebu/Balita/Guwardya-namusil-og-2-kauban-naghikog?ref=rss&format=simple&link=link)

No comments