Recent Posts

Breaking News

Gugma sa biyuda nabanhaw sa ECQ sa DavOro


DAVAO DE ORO -- Kung ang uban naburyo ug gilaay sa sige’g pundo sa balay samtang gipatuman ang Enhanced Community Quarantine (ECQ), ang 62-anyos nga biyuda nalingaw uag di malimtan ang nahimong kasinatian human subling nahibalag pinaagi sa social media ang kanhi trato, ang lalaki nga kaniadto gimahal ug gihigugma sa panahon nga kuno nagtungha pa siya sa hayskol.

Nagpatago sa pangalang Esterlita ang maong biyuda nga sumala pa niya dihang nahinabi sa SunStar Superbalita pinaagi sa video call nga ang 16-anyos niya nga apo nga kauban sa balay maoy nagtudlo ug naghimo sa iyang Facebook account atol sa ECQ.

Matod pa nga biyudo na usab kuno ang kanhi trato nga maoy nag-friend request hinungdan nga subling nabanhaw ang kagahapon nga gilumotan na unta sa kalimot.

Sa sige’g text-text ug video call, butang nga wa mahimo sa ilang panahon sumala pa nga nasumpayan ang naudlot nga ‘ love story' human nga ang lalaki subling pinadayag sa iyang pagdati, di man sa personal apan, dulot sa kasingkasing ang gugmang gihalad sa ikaduhang higayon.

Gibutyag ni Esterlita nga ang panagbulag nila sa mao niyang trato gumikan sa ilang panaglagyo kaniadto human sa graduation sa hayskol apan, ang maong panagbulag walay formal closure.

Matod pa nga naundang ang ilang komunikasyon sanglit, wa pa mauso kaniadto ang selpon ug Facebook.

Dako ang pasalamat sa biyuda sa gipatumang ECQ sanglit, kung di pa tungod niini, di siya makahigayon pagpuyo sa balay ug makapahimo og Facebook sa iyang apo gumikan kay kuno kanunay siyang nagatabok–tabok sa balay sa lima niya ka mga anak nga parehong aduna nay tagsa-tagsa ka pamilya.

Nanghinaut ang biyuda nga human sa ECQ magkita sila sa personal sa kanhi hinigugma ug malaumon nga di mahimong babag ang mga anak sa higayon nga siya magmahal pag-usab sa lalaking unang nagpapitik sa iyang kasingkasing.


Source: Sun.Star Superbalita (https://www.sunstar.com.ph/article/1855826/Superbalita-Davao/Balita/Gugma-sa-biyuda-nabanhaw-sa-ECQ-sa-DavOro?ref=rss&format=simple&link=link)

No comments