Recent Posts

Breaking News

Gomez gikuwestyon ang DILG, Owwa


DISMAYADO si Ormoc City Mayor Richard Gomez sa nadawat nga mensahe gikan sa Department of the Interior and Local Government (DILG) bahin sa pagpauli sa mga taga Ormoc.

Base sa Facebook post ni Gomez, iyang gikwestyon ang DILG, National Housing Authority ug Overseas Workers Welfare Administration (Owwa) tungod sa wa pagsubay sa Covid-19 protocol para sa mga nakaapil sa Balik Probinsya Program.

Matod sa post ni Gomez, gipahibawo sila nga naay tulo ka eroplano nga mo abot sa Tacloban.

Dugang sa post sa mayor, giabisohan sila nga dawaton ang mga pasahero nga taga Ormoc bisan wala na mo subay sa protocols.

"This morning, the DILG regional office and Owwa texted us informing us that there are three planes arriving in Tacloban and telling us to receive them without following Covid protocols, undocumented and untested," matod sa mayor.

Pasabot sa mayor nga walay dokumento nga nadawat ang LGU Ormoc sama sa gidaghanon, pangan ug address.

Tungod kay walay dokumento nga nadawat ang LGU Ormoc, di usab sigurado kung niagi ba kini sila og RT-PCR or swabbing.

Karong adlawa, giingon nga mo abot sa Tacloban ang mga eroplano.

"We have kept our city Covid-free for more than 70 days because of strict border controls and implementation of health protocols," dugang sa mayor.

Gikwestyun sa mayor ang nahisgutang mga ahensiya kung asa na ang ilang protocol nga gusto nilang buhaton sa mga repatriates.

"What happened to their protocols that they have been telling us to do if they themselves are not doing the right thing?" pangutana ni Gomez.

Matod niya, dako ang peligro sa mga tawo sa Ormoc kung naay usa lang ang mag positibo sa Covid-19 tungod sa pagpabaya sa ubang national government agencies.

Sa miaging semana, upat ka taga Ormoc nga sakay sa bus gikan Manila ug niabot sa Palo, Leyte, ang wa dayun dawata sa Ormoc.

Tungod kini sa way sakto nga koordinasyon sa mga national agency ngadto sa LGU Ormoc.

Base sa National Task Force Order 2020-02, dapat pahibaw-on ang LGU tulo ka adlaw sa una pa ang paglarga sa mga repatriates ug susama usab ang mando sa DILG nga dapat dunay saktong koordinasyon. (JKDP)


Source: Sun.Star Superbalita (https://www.sunstar.com.ph/article/1857646/Superbalita-Cebu/Balita/Richard-Gomez-gikuwestyon-ang-DILG-Owwa?ref=rss&format=simple&link=link)

No comments