Recent Posts

Breaking News

Gipatay tungod sa utang


KONDUKTOR sa mini bus nga wa mobayad sa utang gipusil patay sa iyang gi-utangan niadtong Martes sa gabii sa Brgy. Lamacan, lungsod sa Sibonga.

Si Adrian Alcontin, 26, dunay kapuyo, kondoktor, nagpuyo sa dapit, namatay human natusaktusak sa mga bala ang kalawasan.

Samtang nadakpan ang suspek nga si Marven Ortiz, 31, taga Brgy. Poblacion, Sibonga.

Si Alcontin, nag-inom uban sa iyang mga higala sa gawas sa balay sa iyang silingan bisan sa gipatuman nga enhanced community quarantine (ECQ) sa tibuok Sugbo sanglit nagsaulog sa fiesta ang ilang dapit.

Lakip nga nag-inom sa dapit si Ortiz uban sa higala niini..

Si Police Master Sgt. Herbert Pananganan, imbestigador sa Sibonga Police Station, nga nahinabi sa Superbalita Cebu, nagkanayon nga personal grudge ang motibo sa kremin.

Si Ortiz nasuko kay si Alcontin wa mobayad sa iyang utang.

Si Ortiz gikatahong dunay mga negusyo, babuyan, ingon man ginagmay nga pautang.

"Sige naman daw siyag paningil sa biktima sa utang. Kon sunahon asa na ang bayad, hulgaon naman hinuon siya nga patyon,"matod ni Pananganan.

Tungod sa kabalaka ni Ortiz nga patyon siya ni Alcontin dihang nagkita sila atol sa fiesta, iyang gi-unhan sa pag-pusil gamit ang kalibre.45 nga armas. (GPL)


Source: Sun.Star Superbalita (https://www.sunstar.com.ph/article/1855499/Superbalita-Cebu/Balita/Gipatay-tungod-sa-utang?ref=rss&format=simple&link=link)

No comments