Recent Posts

Breaking News

Food runner sa Davao positibo sa Sars-CoV-2


GIBUTYAG sa Southern Philippines Medical Center (SPMC) nga ang food delivery runner kinsa napakyas nga makuhaan og rapid diagnostic test (RDT) nagpositibo sa severe acute respiratory syndrome coronavirus (Sars-CoV-2) atol sa confirmatory test.

Sa paghinabi kang SPMC chief Dr. Leopoldo Vega, siya nagkanayon nga ang Food Panda worker nasusi nga positibo atol sa real-time polymerase chain reaction (RT-PCR), nga mao ang "gold standard" sa pagdeterminar kon ang usa ka tawo nataptan sa Sars-CoV-2 nga maoy hinungdan sa sakit nga coronavirus disease (Covid-19).

Gisalang sa laing test ang Covid-19 positive rider kay ang rapid test di masaligan.

"It's positive with RT-PCR. [He is] still admitted," butyag ni Vega.

Kasamtangan nga gipahiluna ang pasyente sa Queensland isolation facility nga gidesinyo alang sa mga pasyente nga duna'y gamay nga mga simtomas.

Dugang ni Vega nga ang asymptomatic nga pasyente karon hinay-hinay nang naayo ug gitakda og lain pang test aron nga masusi kon "clear" na ba siya gikan sa viral disease una siya tugtan nga mobalik sa ilang balay.

Sayo niini sa paghinabi sa radyo, gisulti ni Davao City Mayor Sara Duterte-Carpio nga ang lokal nga panggamhanan naglakip sa mga food delivery runners sa dakbayan alang sa "Covid-19 case finding" nga paningkamot.

Ilabi na nga nahalobilo sila sa daghang mga indibiduwal nga gikonsidera nga posibleng carrier sa kagaw.

Nagpahimangno ang mayor ngadto sa publiko kinsa nagpahimulos sa food delivery services nga mopraktis og safety measures sama sa kanunay nga paghugas sa ilang mga kamot human madawat ang mga pagkaon gikan sa gawas sa ilang balay, sa kahadlok sa posibleng pagkontamina sa ilang mga gi-order.


Source: Sun.Star Superbalita (https://www.sunstar.com.ph/article/1857337/Superbalita-Davao/Balita/Food-runner-sa-Davao-positibo-sa-Sars-CoV-2?ref=rss&format=simple&link=link)

No comments