Recent Posts

Breaking News

Ferro: Laing 4 ka pulis positibo sa Covid-19


LAING upat na usab ka pulis ang positibo sa coronavirus disease 2019 (Covid-19) ning ulahi, tulo niini nadestino sa Mabolo Police Satation sa dakbayan sa Sugbo ug ang usa nadistino sa Regional Health Service (RHS) 7 ug napuyo sa siyudad sa Talisay.

Matod ni Police Brigadier General Albert Ignatius Ferro, hepe sa Police Regional Office (PRO) 7, ang pulis sa RHS 7 maoy nagbantay niadtong unang pulis nga positibo sa Covid-19 gikan sa Sitio Zapatera, Barangay Luz, siyudad sa Sugbo apan naka-recover na.

Dako ang posibilidad nga didto niya nakuha ang virus. Tungod niini, gipaubos na dayon sa lockdown ang balay sa maong pulis sa Barangay Poblacion, Talisay.

Gilain siya sa balay nila sa Talisay uban sa tibuok niyang pamilya nga gipaubos na usab sa Covid-19 test niadtong Dominggo, Mayo 14.

Samtang, ang tulo ka pulis sa Mabolo ang gilain na usab human migawas ang resulta nga positive sila sa Covid-19.

Gipasabot sa heneral nga ilang gipa-swab test ang tanang personnel sa Mabolo human usa sa ilang dinakpan ang positibo usab sa virus ug migawas sa resulta nga tulo sa kapin usa ka gatus ka mga pulis ang positibo.

“Ato sila gi-isolate first kay naa tay na check nga priso o PUPC (person under police custody) nga nag positive so gi check nako tanan katong sa station 4 nga naay operation sa drugs so nag positive ang tulo,” matod ni Ferro.

Gihimo na sa PRO-7 ang contact tracing sa maong mga pulis alang na sa pagpaubos usab sa isolation sa nakasugat niini.

Gihulagway ni Ferro nga mga asymptomatic ang mga pulis nga nagpositibo gawas lang niadtong taga Talisay nga mga duha ka semana na ang naka labay gihilantan kini.

Ning nagkaduol na ang pag-downgrade sa enhanced community quarantine (ECQ) ngadto sa modified nga mahitabo sunod semana.

Gitinguha ni Ferro nga dili kaliton sa pag-downgrade aron dili mosamot ang problema sa Covid-19.

Kinahanglan pa ang pag-assess sa sitwasyon kung angayan na ba nga loagan ang ilang pagpatuman sa community quarantine gikan sa ECQ.

“Dili pwede nga mag downgrade ta nga fast track, atung i-gradual ang atong transition. Because if you will be having a an abrupt transition this will be a big problem. Kasi daghan na nag second wave tungod kay abrupt ang transition nila and it should be gradual. If we will have an abrupt drastic change, we’ll be endangering all people,” matod ni Ferro.

Labing maayo ang paghimo og mass testing aron masayran nila asa ang labing critical nga dapit sa dakbayan sa Sugbo nga maoy ipaubos sa lockdown. (AYB)


Source: Sun.Star Superbalita (https://www.sunstar.com.ph/article/1857700/Superbalita-Cebu/Balita/Ferro-Laing-4-ka-pulis-positibo-sa-Covid-19?ref=rss&format=simple&link=link)

No comments