Recent Posts

Breaking News

Dul-an sa 300 ka OFWs gipapuyo sa 3 ka hotels


MGA 300 ka Sugboanong overseas Filipino workers (OFWs) nga nangabot gikan sa Manila luwan sa duha ka managlahing mga barko niadtong Sabado, Mayo 23, temporaryong gipapuyo sa tulo ka mga hotel sa Dakbayan sa Sugbo.

Si Michael Braga, information officer sa Department of Interior and Local Government-Central Visayas (DILG 7), niingon nga ang mga hotel nagsilbing holding areas samtang maghuwat sa ilang tagsa ka local government unit (LGU) nga maoy modala kanila sa tagsa ka pinuy-anan.

"DILG thru its OFW desk officers in every LGU will have to arrange and coordinate with concerned LGUs for the return of their constituents, then the barangays since we also need to consider social preparation to avoid discrimination," siya niingon.

Maghuwat

Matod ni Jezza Legarde, family welfare officer sa Overseas Workers Welfare Administration-Central Visayas (Owwa 7), sagad molanat og usa o duha ka mga adlaw sukad sa pag-abot una pa maduso ngadto sa ilang tagsa ka LGU ang mga OFW.

Matod ni Legarde, ila pang sutaon kon pila ka mga OFW ang taga Cebu City ug taga lalawigan sa Sugbo.

Si Legarde niingon nga base sa protocol sa Lalawigan sa Sugbo, ang nanguli nga OFWs nga taga Probinsya kinahanglan moagi una og pito ka adlaw nga quarantine sa ilang gipuy-ang hotel sa Dakbayan sa Sugbo sa di pa sila makauli sa ilang tagsa ka mga dapit.

Duha ka mga barko sa 2Go ang ningdala sa 475 ka stranded nga mga OFW sa Dakbayan sa Sugbo gikan sa Manila. Ang gidaghanon base sa record sa Owwa sa mga alas 9 sa gabii.

Niini, ang 240 ka mga pasahero luwan sa MV St.. Michael of the Archangel nga niabot sa Pier 6 mga alas 10:30 sa buntag sa Sabado, samtang ang 235 sakay sa MV St. Francis Xavier nga niabot mga alas 3 sa hapon.

Sa 235 nga sakay sa MV St. Michael the Archangel, 151 taga Sugbo; 65 taga Bohol ug 22 taga Leyte.

Sa 235 ka OFW nga sakay sa MV St. Francis Xavier, 155 taga Cebu; 69 taga Bohol ug 11 taga Leyte.

Ang 33 ka mga OFW nga taga Leyte nakauli na sa ilang lalawigan sakay sa laing biyahe sa barko mga alas 10 sa gabii sa Sabado, samtang 35 sa 136 ka mga Bol-anon nibiya sa Cebu padung sa Bohol sa samang gabii.

Ang nahabiling mga OFW temporaryong gipapuyo sa mga hotel sa Dakbayan sa Sugbo.

"Tungod sa capacity sa barko. Mao ray gi-allow ang 35 kabuok. Mostly from first batch sa mv St. Michael," siya niingon.

Matod ni Legarde, kini nga mga OFW nagsagulsagol kay naay land-based ug sea-based, apan kadaghanan mga seafarer.

Matod ni Dr. Terrence Bermejo, chief sa Bureau of Quarantine-Cebu (BOQ Cebu) chief, nga way bisan usa sa mga OFW nagpakita og mga simtomas sa ilang pag-abot.

"Wala man normal tanan all with negative PCR test results," siya niingon.

Gi-swab test na

Si Department of Health 7 Regional Director Jaime Bernadas niingon nga kining nanga-stranded nga mga OFW di na kinahanglang mopailawom pa sa rapid testing alang sa coronavirus disease 2019 (Covid-19).

Kay kining mga OFW nga gitugtang makauli ubos sa inter-agency program alang sa pagpapauli sa mga OFW negatibo na sa results sa swab test nga gipahigayon sa Manila. (WBS)


Source: Sun.Star Superbalita (https://www.sunstar.com.ph/article/1857569/Superbalita-Cebu/Balita/Dul-an-sa-300-ka-OFWs-gipapuyo-sa-3-ka-hotels?ref=rss&format=simple&link=link)

No comments