Recent Posts

Breaking News

DOH: target sa mass testing nakuha


ANG tulo ka mga dagkong syudad sa Metro Cebu nakapailawom sa 45,905 ka mga individual sa strategized community mass rapid testing gikan sa 39,645 ka mga panimalay atol sa pagtapos niadtong Mayo 20, 2020.

Ang Mandaue City ug Lapu-Lapu City pulos nilapas sa ilang target.

Ang Lapu-Lapu dunay 162.33% samtang ang Mandaue City niabot og 115%.

Ang Dakbayan sa Sugbo dunay 85.61% sa 78 sa 80 ka barangays.

Matod sa Department of Health (DOH) 7, igo na kaayo ang nakuha nga gidaghanon aron pagkab-ot sa tumong nga masuta unsa ang sunod nga lakang ang pagabuhaton sa mga local government unit (LGU) batok sa pagkatap sa coronavirus disease 2019 (Covid-19.)

Base sa resulta, ang Cebu City ug Mandaue wa pay nagpositibo sa swab test, apan unom ang Covid positive sa Lapu-Lapu City human sila nasuta nga IgM positive sa rapid test.

Si Dr. Mary Jean Loreche, chief pathologist sa DOH 7, nagkanayon nga sa pagkakaron, ang 24,213 ka mga individual ang nakuhaan og resulta.

Nasuta nga 23,121 kun 95 porsyento negative samtang 447 ka individual ang ipaubos sa swab test sanglit positibo sila sa IgM.

Adunay 229 ka mga swab sample para sa PCR gikan sa tulo ka nga siyudad ug negatibo ang resulta, gawas sa unom nga positibo kun 5.5 % nga gikan sa Lapu-Lapu City.

Sa tibuok Central Visayas, niabot na og 2,126 ang mga pasyente sa Covid.

Gipadayag ni Loreche nga 80 porsyento mga asymptomatic diin labing daghan niini nagagikan sa dakbayan sa Sugbo nga gipahiluna na sa mga barangay isolation center.

Taliwa sa kadaghan sa kaso, ang case fatality rate pabilin nga anaa sa 1.65% diin, apan ang Cebu City anaa lang sa 0.88% nga maoy labing ubos sa mga LGU nga daghan og kaso sa tibuok nasod. (PAC)


Source: Sun.Star Superbalita (https://www.sunstar.com.ph/article/1857255/Superbalita-Cebu/Balita/DOH-target-sa-mass-testing-nakuha?ref=rss&format=simple&link=link)

No comments