Recent Posts

Breaking News

Covid-19 Advisory: ‘New normal’ sa mga biyahero sa tugpahanan


USA sa nag-atubang sa grabeng pagsuway resulta sa coronavirus pandemic mao ang airlines, travel companies ug sektor sa turismo.

Aron nga makabangon og balik ang maong naasoyng industriya gikinahanglan nga ang mga pasahero mahatagan sa tukmang pag-atiman ilabi na sa ilang panglawas nga maghatag sab nila og kumpiyansa sa ilang pagbiyahe human sa Covid-19.

Tungod niini, gipatuman ang ‘touchless travel’ ug health safety nga gipaluyohan sa digital tools nga mao ang “Known Traveller Digital Identity” approach.

Grabeng pagka-igo

Base sa taho sa World Economic Forum nga sa pagbuto sa Covid-19 nausab ang naandan nga dagan sa kalibutan ilabi na ang global travel.

Sa labing unang higayon sa kasaysayan adunay 90 porsento sa populasyon tibuok kalibutan ang nakasinate sa gipatuman nga travel restrictions.

Gibana-bana nga adunay 25 milyones nga aviation jobs ug 100 milyones nga travel ug tourism jobs sa nagkadaiyang suok sa kalibutan ang nameligro gumikan sa maong krisis.

Gikataho nga gumikan sa pagkabalda sa mga biyahe naalkansi ang airline industry nga moabot sa lima ngadto sa pito ka tuig ang kantidad sa ilang untang kita-on.

“We will travel again, but it will not be the same. Even if borders reopen, travellers must trust that boarding a plane is safe and that they will be able to enter the destination country,” tipik sa natala sa artikulo sa World Economic Forum.

Ang nagkadaiyang kagamhanan sa nasud ug ang airline industries mihimo na og mga kausaban sa tinguha nga makabangon sa madaling panahon ang maong industriya.

Ang paggamit og digital identity ug biometrics technologies ang usa ka epektibo nga paagi nga luwas ug paspas ang transaction sa ilang pagbiyahe sa matag pasahero

Touchless Travel

Nakita ang dakong panginahanglan sa kausaban mao ang pagtuman sa touchless travel diha sa matag tugpahanan ngadto na sa hotel check-in, lakip na ang paglimpyo sa tibuok tugpahanan sa tinguha nga kalikayan ang inpeksiyon sa mga biyahero ngadto na sa airport staff.

Nasayran nga taod taod nang gigamit ang biometrics isip identity verification pinaagi sa fingerprint o hand scanners apan ang maong paagi anam nang na-phase out kay adunay mas moderno nga teknolohiya sama sa ‘contactless fingerprint’, face o iris (mata) recognition.

Samtang gisuwayan na sab ang touchless data-entry, touchless document scanning ug voice command.

Digital Health Passports

Tungod sa gipatuman nga health protocol sa International Air Transport Association (IATA) gihulma na sab ang health protocols ug standard gamit sa digital techonology diha sa travel ug tourism industry.

Nasayran nga ang Emirates airlines nipatuman og on-site Covid-19 testing sa ilang mga pasahero, samtang ang European airports nagsugod na sai lang ‘passenger health screening’.

Ubay-ubay na sab nga mga kanasuran ang nigamit sa symptom-tracking ug contact-tracing apps nga nakig-alayon sa Apple ug Google alang sa maong software scheme.

“New health-screening and tracking tools offer hope of a return to relaxed and confident travel,” natala sa weforum.org.

Pabilin gihapon nga gikinahanglan ang pasaporte sa matag pasahero, apan ang nahitabong pandemic, nagkaninahanglan ang makabag-o nga paagi aron nga mabalik sa naandan ang operasyon ang mga tugpahanan.


Source: Sun.Star Superbalita (https://www.sunstar.com.ph/article/1857251/Superbalita-Cebu/Balita/Covid-19-Advisory-New-normal-sa-mga-biyahero-sa-tugpahanan?ref=rss&format=simple&link=link)

No comments