Recent Posts

Breaking News

CIDG 7 moimbestigar SAP isyu sa Lapu-Lapu


GISUGDAN na sa Criminal Investigation and Detection Group (CIDG) 7 ang imbestigasyon sa giingong iregularidad sa pagpang apod-apod sa Special Amelioration Program (SAP) sa Dakbayan sa Lapu-lapu.

Ang SAP ayuda nga gihatag sa Department of Social Welfare and Development (DSWD) alang sa mga kabus nga apektado sa enhanced community quarantine (ECQ) tungod sa hulga sa corona virus disease (Covid- 19) sa tibuok nasud.

Giagi ang tipik niini sa mga local government unit (LGU).

Sa Siyudad sa Lapu-Lapu, nahimong kontrobersyal ang paghatag sa SAP human nga giingong naapil sa lista ang pamilya sa usa ka social worker officer sa dakbayan.

Giingong naapil pa ang uyab sa iyang anak.

Human masayod si Mayor Junard Chan niini pinaagi sa usa ka reklamo, niawhag siya sa CIDG sa pag-imbestigar.

Ang city legal office nagpahigayon usab og imbestigasyon sa pasangil batok kang Maria Leonor Feliciano.

Si Feliciano nanghunaw sa pagkalip sa iyang pamilya sa listahan kay duna silay volunteers nga naglibot aron pagpanguha sa mga ngan sa mga beneficiary.

Si Police Major Ronald Allan Tolosa, deputy chief sa CIDG-7, nagkanayon nga ang ilang gihimo mao ang pagsuta kinsa ang manubag sa iregularidad sa pagpang apod-apod sa ayuda sa gobiyerno.

Bisan kon aduna nay mga residente sa Lapu-Lapu City nga ning-uli na sa P6,000 nga hinabang gikan sa DSWD, kinahanglan pa gihapon ipaubos sa imbestigasyon.

“Bisan pag gipang sauli na, ato gihapon imbestigaron nganong nagkaroon ng ing-ana sa listing, availment sa beneficiaries nga bisan pag giuli nimo na, naa gyud tay imbestigahon nganong nahitabo na siya,” matod ni Tolosa.

Gipangkuha na ang mga ngalan sa mga nakabenepisyo sa amelioration program aron ilang sigurohon nga ang nahatagan mao ang nanginahanglan.

Nipasabot si Tolosa nga ang papel sa CIDG-7 mao ang pag himog imbestigasyon nunot sa kamandoan gikan sa ilang ulohang buhatan pinasikad usab sa mando ni Presidente Rodrigo Duterte sa pag-imbestigar sa mga kahiwian sa paghatag sa mga hinabang.

Si Duterte nitanyag og P30,000 nga ganti sa makahatag og balidong impormasyon sa pagpangurakot sa mga opisyal sa mga hinabang sa kagamhanan alang sa mga apektado sa ECQ. Kon mamatud-an nga sad-an si Feliciano, ila kining i-recommend sa ilang national office nga pasakaan og kasong graft and corruption.

Si Police Brigadier General Albert Ignatius Ferro, pangu sa Police Regional Office (PRO) 7, sa iyang bahin, nagkanayon nga ang kapulisan magbantay sa pagpanghatag sa hinabang nga di mapunta sa bulsa sa mga opisyal sa gobiyerno.

Matod niya nga ang angay nga makadawat kinahanglan kadtong labing kabus nga labihang naapektohan sa ECQ.

Sa pagkakaron, matod ni Ferro, kini pa lang kaso ni Feliciano ang unang giimbestigar sa kapulisan sa Central Visayas.

Nakadawat sila og daghang mga reklamo gikan sa publiko nga wala sila mahatagi bisan sa ilang kalisud karon. (AYB)


Source: Sun.Star Superbalita (https://www.sunstar.com.ph/article/1855754/Superbalita-Cebu/Balita/CIDG-7-moimbestigar-SAP-isyu-sa-Lapu-Lapu?ref=rss&format=simple&link=link)

No comments