Recent Posts

Breaking News

Chan supak sa mando sa DILG bahin sa OFWs


NIPADAYAG sa iyang wa pag-uyon si Lapu-Lapu City Mayor Junard Chan sa giluwatan nga supplemental advisory gikan sa ulohang buhatan sa Department of Interior and Local Government (DILG) nga nagmando sa matag local government units (LGUs) ang moatiman sa overseas Filipino workers (OFWs) nga moabot sa ilang tagsatagsa ka mga lugar.

Kini ilabi na niadtong OFWs nga wa mapaubos sa polymerase chain reaction (PCR) test ingon man ang pag-abaga sa hotel accommodation alang sa pag-quarantine samtang nagpaabot sa resulta sa maong test.

Nabalaka si Chan sa maong kamanduan ilabi na nga wa nay igong pundo ang siyudad alang sa maong katuyoan.

“Wa na mi kuwarta, uy? Asa mig kuwarta? Naa miibayad sa hotel? Naglisod man gani mi sa... ato man gani ni gi-pull out ang mga asymptomatic (pasyente) sa hospital kay nagdaginot ta, ari nato ibutang sa atoang isolation facility,” yawyaw sa mayor.

Ang maong reaksiyon ni Chan may kalabutan sa supplemental advisory diin natala sa general provisions no. 3: “Just in case that the OFW has incomplete or no documents on hand, the LGU may quarantine him/her or reverse transcription polymerase chain reaction (RT-PCR) test and isolate them, while waiting for the results.”

Sumala pa sa opisyal nga unang nasabutan nga ang Overseas Workers Welfare Administration (Owwa) nga mo-atiman sa repatriated OFWs nga wa maka-uli kay natanggong human maabti sa lockdown.

Nanawagan si Chan ngadto sa Owwa nga maoy unang nipasalig nga maoy mo-abaga sa pag-atiman sa OFWs nga moabot sa Lapu-Lapu, ilabi na nga nahimutang sa dakbayan ang tugpahanan.

Matod sa opisyal nga ang naandan nga protocol sa maong mga OFW nga moabot sa tugpahanan nga kompleto sa medical certificate nga negatibo sa coronavirus disease human nga nakapaubos sa Covid test sa dapit diin sila nanukad.

Bugtong responsibilidad sa LGU maoy ang pagkuha niadton OFW nga negatibo sa test aron sa pag-house-to-house og hatod ngadto sa ilang tagsatagsa sa ka mga pinuy-anan.

“Ang ato, sige tag amping dire, mao ning manulod ni dire, sudlan ta dire og virus... mangahurot gyud ta ani,” matod pa ni Chan sa inisyal nga taho nga iyang nadawat nga adunay mga OFW nga naaboa sa Mactan gikan sa kaulohan niadtong Martes, Mahyo 26, diin pipila kanila ang gikataho nga way dokumento. (FVQ)


Source: Sun.Star Superbalita (https://www.sunstar.com.ph/article/1857987/Superbalita-Cebu/Balita/Chan-supak-sa-mando-sa-DILG-bahin-sa-OFWs?ref=rss&format=simple&link=link)

No comments