Recent Posts

Breaking News

Caindec: Doble plaka makaayo sa motorista


MAKAAYO sa mga motorista ang Republic Act No. 11235, apan makadaot sa mga dealer og motorsiklo, kinsa adunay gitagoan nga mga binuang.

Kini ang paghulagway ni Regional Director Vic Caindec sa Land Transportation Office (LTO) 7 human giaprobahan ang Implementing Rules and Regulations (IRR) sa Motorcycle Crime Prevention Act alang sa umaabot nga pagpatuman.

"Ang isyu ani, para ngadto sa mga dealer og motorsiklo nga nagbinuang, ngano ila man ning gikontrahan nga balaod? Kay nasuko lagi sila kay ang provision gud sa balaod nga mag estrikto sa rehistro. Unya kinsa may nagbinuang sa rehistro? Sa una, nagtuo ta nga ang LTO. Karon nahibaw-an man nga sila ra diay," padayag ni Caindec.

Si Caindec niingon nga ang balaud makaayo sa mga buyer sa motorsiklo kay makapapaspas kini sa paghikay sa rehistro sa motorsiklo.

Usa sa mga reklamo sa mga tag-iya sa motorsiklo mao ang kadugay sa mga dealer makahatag sa rehistro.

"In fact kaning balaora, maayo ni para sa mga buyer og motor kay dili naman makarason ang dealer nga wa niya rehistro kay dugay ang LTO. Unya ang LTO di na pud ka rason nga dugay niya ipagawas ang rehistro kay gitagaan man ang LTO og panahon nga five days (pagrehistro) gikan sa pagkahalin," dugang ni Caindec.

Si Caindec nipasabot nga angay pa nga malipay ang mga motorista nga tarong ug wa nagplano og daotan gamit ang ilang motorsiklo kon ipatuman na kini.

Decal Ra?

Giklaro usab ni Caindec nga di makonsidera nga duha ka plate ang naa sa motorsiklo sanglit ang atubangan usa ka decal o sticker ang ipapilit.

Anha sa luyo ang metal nga plate number nga dako itandi sa karaan nga rehistradong plaka.

Ang director sa LTO 7, nagkanayon kadtong mga motorista nga adunay mga dautang buhat sigurado nga di makauyon.

Apan kadtong mga tarong mohangop sa implementasyon kay sama kini sa gibuhat sa mga nasod sa Europe.

Di Pa Panahon

Si Joher Ardon, presidente sa Max Scooter Cebu Philippines (MSCP) nga adunay kapin 200 ka mga miyembro, nihulagway sa balaud nga di pa angay nga panahon ipatuman.

Apan matod niya nga wa nay mahimo ang mga nanag-iya og motorsiklo.

"Dili gyud ta kapugong kay balaod na man na kay napirmahan na sa Presidente. Apan wrong timing kaayo ang pag-implement tungod sa atong panahon nga crisis tungod sa Covid-19," pasabot ni Ardon.

Apan, daghan sa iyang mga higala nakasinati sa problema sa kadugay sa paglusot sa official receipt ug certificate of registration nga karon di na mahitabo kon ipatuman na ang IRR sa balaud.

“Kining mga dealer karon sa motor moingon sila nga 3 months pa mogawas ang OR, CR. Apan si RD Caindec niingon nga dili na mao. Unya kinahanglan unta ilang i-report ang ilang unit nga nahalin apil sab kon cash ba o utang. Apan gihimo sa labing dako nga dealer, ilang tingubon og report mao nang customer nila maoy masakripisyo kay mao may madakpan kay wa pay rehistro,"padayag ni Ardon.

Ang makalapas ug di mosunod ubos sa IRR, adunay multa nga P20,000 ngadto sa P100,000 nga bayran sa nagmaneho sa motorsiklo.

Gidak-on

Apan unsa man ka dagko ang plate number sa mga motorsiklo ug unsay color sa plaka sa Region VII?

Base sa IRR, sa Central Visayas adunay color orange ang plaka.Ang motorsiklo adunay duha ka plate numbers, apan decals o stickers ang atubangan inay metal.

Kini adunay gidak-on nga 85mm (height) x133mm (width) nga dako ug gamay sa orihinal nga plaka.

Sa metal plate, aduna kini gitas-on nga 135mm ug 235 mm ang gilapdon.

Reflectorized ang background uban sa sa iyang security features nga igong mabasa sa gilay-on nga 15 metros.

Matod sa pangulo LTO 7 nga di sila manakop kon ang ilang buhatan di pa maka-release sa libuan ka mga plaka nga natanggong ang pag-imprinta gumikan sa bag-ong balaud. (PAC)


Source: Sun.Star Superbalita (https://www.sunstar.com.ph/article/1857718/Superbalita-Cebu/Balita/Caindec-Doble-plaka-makaayo-sa-motorista?ref=rss&format=simple&link=link)

No comments