Recent Posts

Breaking News

Bag-ong CCMC building tiwason na pagtrabaho


ADUNA nay gideklara nga lowest bidder ang Bids and Awards Committee (BAC) aron maoy motiwas og trbaho sa unang tulo ka andana sa Cebu City Medical Center (CCMC) aron mahingpit ang iyang operasyon.

Si Rodjun Taneo, chairman sa BAC, nagkanayon nga duha ka bidder ang interesado sa dul-an P100 milyones nga proyekto para sa architectural, electrical, mechanical ug uban pa nga kahimanan ug installation sa unang tulo ka andana.

Ang pangulo sa BAC alang sa imprastraktura, nagkanayon nga ipaubos pa sa technical working group (TWG) sa post qualification ang lowest bidder nga posibleng matapos sulod niining semanaha ug sa sunod semana adunay rekomendasyon ang TWG.

Dugang ni Taneo nga human sa TWG ug makapasar sa post qualification ang maong contractor, ang BAC mopasar og resolution para sa kontrata ug mosunod ang pag-isyu og notice to proceed.

Gibanabana sa chairman sa BAC nga kon walay kakulian, dili pa mahuman ang Hunyo, makasugod na og trabaho ang nidaog nga contractor.

Si Mayor Edgardo Labella gusto nga mapaspasan ang pagtrabaho sa bag-ong CCMC nga unang gisugdan niadtong tuig 2015 panahon ni kanhi Mayor Michael Rama.

Napildi si Rama niadtong 2016 eleksyon ni kanhi Mayor Tomas Osmeña apan wala pa gihapon mahuman bisan ang tulo ka andana nga maoy giingon ni Osmeña nga maka-operate na niadtong tuig 2018 nga mao unta ang target nga mahuman ang construction.

Si Labella dili gusto nga aduna pay mahitabo nga pagkalangan ug buot niya nga magamit na kini alang sa mga Sugbuanon nga walay ikabayad sa mga pribadong tambalanan. (PAC)


Source: Sun.Star Superbalita (https://www.sunstar.com.ph/article/1857610/Superbalita-Cebu/Balita/Bag-ong-CCMC-building-tiwason-na-pagtrabaho?ref=rss&format=simple&link=link)

No comments