Recent Posts

Breaking News

7 health workers nagpositibo sa Covid-19


WALO sa siyam ka bag-ong kaso sa Coronavirus disease 2019 (Covid-19) sa Digos City mga health workers, sigon ni Mayor Josef Cagas Dominggo, Mayo 31.

Sa gipaguwang pahayag ni Cagas, ang mga health workers pulos kawani sa Davao del Sur Provincial Hospital.

Gikan sa duha, nakatala ang City Health Office (CHO) og dugang kaso nga siyam niadtong Biyernes, Mayo 29, 2020.

Ang nadugang nga pito pulos health workers, matud ni Cagas.

Gibutyag ni Mayor Cagas nga nasubo siya human gikumpirma sa CHO ang pito ka bag-ong kaso sa Covid-19 sa siyudad.

Hinuon, gipasalig ni Cagas sa tanang DigoseƱos nga milihok dayon ang mga opisyal sa CHO pinaagi sa koordinasyon ngadto sa ospital.

Giawhag sab ni Cagas ang katawhan sa siyudad nga di mag-panic inay mag-amping kanunay, batasanon ang social distancing, paghugas og kamot ug kanunay’ng pagsul-ob og face mask.

Apan, si Dr. Ronald Jumilla, Digos City health officer, nagklaro nga ang pito wala nagpakita og sintomas sa sakit apan kasamtangang gibutang sa isolation sa provincial hospital.

Ang walo ka health workers ang matod pa na-impeksyon sa virus human nadiskubreng nag-positibo sa test niadtong Mayo 26.

Nahimong negatibo hinoon ang test sa usa ka 29-anyos nga lalaki sa gipagawas nga resulta niadtong Huwebes.

Apan, gihuwat pa ang gihapon ang resulta sa ikaduhang test aron madeklarang luwas na kini sa virus ug makaguwa sa isolation.

Kahinumdoman nga ang unang kaso sa Covid-19 sa dakbayan, usa ka lalaki nga mitambong sa cockfighting derby didto sa Davao City niadtong Marso.

Adlaw’ng Sabado, Mayo 30, gibutyag sa CHO nga miabot na sa 47 ang suspetsado sa Covid-19 sa lungsod.

Anaa sab sa 23 ang gibutang sa isolation unit sa dakbayan samtang anaa sa 104 ang gipailawom sa strict home quarantine.

Samtang, sa Covid-19 tracker sa Department of Health (DOH)-Davao Region, miabot na sa 13 ang kaso sa Davao del Sur ug aduna’y duha ka nakarekober.

Sa mga probinsya sa rehiyon, nag-una gihapon ang Davao del Norte ug Davao Oriental nga parehong aduna’y 15 ang nag-positibo.

Apan anaa sa 11 ang nakarekober sa Davao del Norte ug tulo ang namatay ug tulo sab ang nakarekober sa Davao Oriental diin wala’y namatay.

Parehong aduna’y duha ka kaso ang Davao de Oro apan wala’y namatay ug Davao Occidental nga usa ang namatay.

Sa Davao Region, pinakataas sa ihap gihapon ang Davao City nga mokabat na sa 298 ang kaso sa Covid-19, 120 ang nakarekober ug 25 na ang namatay.

Sa kinatibuk-an, aduna’y natala nga 16 ka bag-ong kaso ang rehiyon kun diin misumada na kini sa 345 ka kaso, 29 ang namatay ug 138 ang nakarekober.


Source: Sun.Star Superbalita (https://www.sunstar.com.ph/article/1858435/Superbalita-Davao/Balita/7-health-workers-nagpositibo-sa-Covid-19?ref=rss&format=simple&link=link)

No comments