Recent Posts

Breaking News

69-anyos nga babaye ikatulong gi-Covid sa Consolacion


NAKATALA ang Consolacion, amihanang Sugbo, sa ilang ikatulong kaso sa coronavirus disease sa Sabado, Mayo 23, 2020.

Mao kini ang gipahibawo ni Consolacion Mayor Joannes Alegado pinaagi sa official Facebook page sa lungsod.

Ang ikatulong pasyente usa ka 69-anyos nga babaye nga taga sityo Proper, Barangay Pulpogan.

Una nga gidala ang pasyente sa Eversely Child Sanitarium General Hospital sa Mayo 20 tungod sa paglisod og ginhawa. Sa maong hospital usab siya gikuhaan og swab sample.

Human masuta nga siya positibo, gibalhin dayon siya sa Vicente Sotto Memorial Medical Center.

Nagsugod na sa contact tracing ang lungsod.

Nanawagan si Alegado alang sa di sakop sa pamilya apan nakahimamat sa pasyente sa pagpahibaw sa barangay ug pagpa-isolate gilayon.

Gihangyo usab niya ang tanan sa pag ampo sa paspas nga recovery sa pasyente.

Ang labing unang pasyente sa Covid-19 sa lungsod mao ang usa ka doktor nga nakabiyahe sa Middle East.

Ang ikaduha mao ang usa ka repatriate nga overseas Filipino worker nga taga Barangay Sacsac. (ANV)


Source: Sun.Star Superbalita (https://www.sunstar.com.ph/article/1857453/Superbalita-Cebu/Balita/69-anyos-nga-babaye-ikatulong-gi-Covid-sa-Consolacion?ref=rss&format=simple&link=link)

No comments