Recent Posts

Breaking News

6 ka kaso sa Covid-19 natala sa Leyte prov.


LEYTE - Unom na ang kompirmado nga kaso sa coronavirus disease 2019 (Covid-19) ang natala sa lalawigan sa Leyte.

Ang unom nga pasyente nakaapil sa Balik Probinsya Program, samtang ang usa ka pasyente usa ka overseas Filipino worker (OFW).

Niadtong Mayo 28, Huwebes, gianunsyo sa Department of Health (DOH) Eastern Visayas ang duha ka kompirmadong kaso sa Covid-19 sa Leyte.

Usa sa Baybay City ug laing usa sa Tanauan, Leyte.

Sa Baybay City, ang pasyente usa ka 28 anyos nga lalake nga nisakay og bus gikan sa kaulohan ug niabot niadtong Mayo 21 sa Palo, Leyte.

Ang usa ka pasyente gikan sa Tanauan, Leyte, usa ka 26 anyos nga lalake nga nakaapil usab sa Balik Probinsya Program.

Pagka Biyernes sa hapon, Mayo 29, gikompirmar usab sa DOH-Eastern Visayas nga nakatala og usa ka kompirmadong kaso sa Covid-19 ang Hilongos, Leyte.

Ang pasyente usa ka 31-anyos nga lalake, usa ka OFW nga nagtrabaho sa cruise ship ug nisakay og eroplano gikan Manila ug niabot sa Tacloban sa miaging Huwebes, Mayo 25.

Asymptomatic ang pasyente ug kasamtangan nga gi-isolate sa Hilongos, Leyte Isolation Center. Sa samang adlaw, natala usab ang labing unang kaso sa Jaro, Leyte ang labing unang kaso sa lungsod, usa ka 21 anyos nga lalake.

Pagkagabii gianunsyo usab sa DOH ang labing unang kaso sa Covid-19 sa Tolosa, Leyte, ang pasyente usa ka 32 anyos nga lakake, usa ka OFW nga nagtrabaho sa cruise ship ug niabot sa Tacloban sakay sa eroplano sa miaging Mayo 25.

Sa misunod nga adlaw, gipahibawo sa DOH ang ikaduhang kaso sa Covid-19 sa Tanauan, ang pasyente usa ka 30 anyos nga babaye nga OFW. Gi-isolate na ang tanan pasyente ug padayon ang contact tracing.

Sa miaging semana, nadismaya si Ormoc City Mayor Richard Gomez sa pipila ka national government agencies gumikan sa kalit nga pagpauli sa mga OFW ug Locally Stranded Individual sa Leyte.

Matod sa mayor, walay saktong koordinasyon ug impormasyon nga gihatag ang national government sa pagpauli.

"Hindi po kami nagmamarunong at hindi po ito contest ng pagalingan. Trabaho lang po. Kung nananatili kaming Covid-negative it is not for personal glory because at the core of every effort we put out there is the commitment to protect and save lives of our people. Yun lang ho yung goal," matod ni Gomez.

Tuyo niya nga ma-verify ang usa nila kon taga Ormoc ba gyud ang nanguli ug dunay bay mga papeles ug niagi naba og test. Base sa kamanduan sa Inter-Agency Task Force ug Department of the Interior and Local Government, dapat pahibaw-on ang LGU tulo ka adlaw sa una pa ang pag-uli. (JKDP)


Source: Sun.Star Superbalita (https://www.sunstar.com.ph/article/1858456/Superbalita-Cebu/Balita/6-ka-kaso-sa-Covid-19-natala-sa-Leyte-prov?ref=rss&format=simple&link=link)

No comments