Recent Posts

Breaking News

5 tawo gipamusil kay naglalis sa septic tank


LIMA ka mga tawo ang gipamusil gumikan sa giingong lalis sa septic tank Dominggo sa buntag, Mayo 31 sa Waling-Waling Street, Barangay Buhangin Proper, Davao City.

Sukad sa pagsuwat ning balita padayon ang gihimong imbestigasyon sa kapulisan sa Buhangin Police Station labot sa hitabo.

Sa post ni Josephine Motuc Cabroles sa iyang Facebook makita ang mga hulagway nga dunay gitapukan og mga tawo nga gisakay sa usa ka sakyanan.

Sa caption sa mga hulagway nagkanayon, “Tungod sa septic tank, silingan gipamusil sa Waling-Waling Buhangin karong buntag.”

Dugang sa iyang saysay sa post, “Naa nabarilan diri sa Waling-Waling Buhangin, pamilya gihatud na sa ospital. Halos lima ka tawo gibaril gi ulo pa gyud. Hadlok kaayo! Bikil sa septic tank. Pati iyaha anak sa namusil gibaril niya.”

Sumpay sa iyang post, “Update ta! Namatay ang asawa ni Ryan, buntis pa gyud. Si Ryan 50/50. Ang mga igsuon kritikal pa. Si ate Amy kay sa may kiliran nabaril ug ang anak sa namusil patay pod nga si Nonoy.”

Hinuon ang maong hitabo positibo nga gikumpirma ni Davao City Police Office (DCPO) spokesperson Police Captain Rosario Aguilar pinaagi sa text message, diin wala pa sila nakapagawas og spot report sanglit gihan-ay pa nila ang dagan sa insidente.


Source: Sun.Star Superbalita (https://www.sunstar.com.ph/article/1858437/Superbalita-Davao/Balita/5-tawo-gipamusil-kay-naglalis-sa-septic-tank?ref=rss&format=simple&link=link)

No comments