Recent Posts

Breaking News

462 ka Sugboanong OFW mangabot


MOKABAT sa 462 ka stranded nga overseas Filipino workers (OFW) nga gikan sa Manila mangabot sa siyudad sa Sugbo sa managlahi nga mga biyahe sa barko karong adlawa, Mayo 23, 2020.

Si Lieutenant Junior Grade Erick Salcedo, tigpamaba sa Philippine Coast Guard-Central Visayas, niingon nga duha ka mga barko sa 2Go, MV. St. Francis Xavier ug MV St. Michael the Archangel maoy sakyan sa mga OFW gikan sa Manila.

Sila gitugtan sa pag-uli ubos sa interagency program sa pagpapauli sa mga OFW.

"They have already been swabbed/tested by the polymerase chain reaction (RT-PCR) test. Nakapag-yield na po sila ng negative results (for novel coronavirus)," siya niingon.

Matod ni Salcedo nga unang nibiya ang St. Michael the Archangel nga dunay 401 ka mga OFW. Duna kini rota: Manila-Cebu-Dumaguete City-Ozamiz City-Iligan City-Zamboanga City.

Moabot kini sa mga alas 9-10 sa buntag sa Mayo 23 sa Dakbayan sa Sugbo.

Sa 401 ka mga pasahero, 253 ka OFW ang gitakdang mokanaug sa Cebu City; 33 sa Dumaguete City; 73 sa Ozamis City; unom sa Iligan City ug 36 sa Zamboanga City.

Mga ala 1 sa hapon sa Biyernes, nilawig usab ang ikaduhang barko, ang MV St. Francis Xavier, luwan ang kinatibuk-ang 374 ka mga OFW.

Ang MV St. Francis Xavier dunay mga rota: Manila-Cebu-Butuan-Cagayan.

Gipaabot kining modunggo sa Pier 5 sa mga alas 12 sa udto sa Mayo 23.

Sa kinatibuk-ang gidaghanon, ang 209 mokanaug sa Dakbayan sa Sugbo, 90 sa Cagayan ug 75 sa Butuan City.

Matod ni Salcedo nga wa pa sila masayod kon ang mangabot nga mga OFW mga seafarer o land-based nga mga trabahante o kombinasyon sa duha.

"The two vessels supposedly was scheduled to depart last night (Huwebes sa gabii)," siya niingon.

"However, stringent yung ginagawa nating pag screen sa kanila kaya na-delay po yung pag ano. Just to insure na talagang lahat nung nag board sa vessel ay kompleto po yung papers at na clear po talaga sila," siya nidugang.

Si Salcedo niingon nga base sa interagency nga panagtagbo kagahapon sa buntag, sa pag-abot sa mga OFW sa Dakbayan sa Sugbo, mopailawom sila og rapid testing ug laing 14 ka adlaw nga quarantine sa mga pasilidad sa quarantine dinhi.

Ang mao nga mga pasilidad mao ang samang mga hotel sa Dakbayan sa Sugbo nga naa ang first batch sa nanguli nga mga OFW.

Samtang ang Cebu Port Authority (CPA) niingon nga uban sa Bureau of Fire Protection (BFP), mopahigayon sila og disinfection ug decontamination sa dapit sa pag-abot ug paghuman og sabot sa mga OFW.

Si Marynoll Lague, CPA public relations officer, niingon nga ang CPA mosunod og estriktong health protocol subay sa guidelines sa Department of Health (DOH) 7.

"All assisting personnel should wear complete personal protective equipment (PPEs) and ang area sa arrival, atoa na gisecure to avoid contact with other port workers. CPA will also prepare the registration area, and set up WiFi for ready downloading of the WeTrace App for monitoring and tracing," siya nagkanayon.

Ang PCG, niadtong Huwebes, Mayo 21, nipahibawo nga 14,669 ka mga OFW ang naa sa nagkadaiyang quarantine centers ang giisyuhan og quarantine clearance human sila nagnegatibo sa novel coronavirus ug nakakompleto sa 14 ka adlaw nga quarantine sa pasilidad. (WBS)


Source: Sun.Star Superbalita (https://www.sunstar.com.ph/article/1857357/Superbalita-Cebu/Balita/462-ka-Sugboanong-OFW-mangabot?ref=rss&format=simple&link=link)

No comments