Recent Posts

Breaking News

4 nadakpan sa tigbakay sa Buhisan


UPAT ka mga tawo nasikop sa mga sakop sa Labangon Police Station nga nagtigbakay alas 4:30 sa hapon sa Dominggo, Mayo 24, 2020, sa Sityo Proper, Barangay Buhisan, Dakbayan sa Sugbo.

Ang mga nangadakpan giilang sila si Felix Caballero Gingoyon, 58, taga Sitio Taytayan, Buhisan; Jandy Lavandero Hernandez, 44, taga Buhisan Proper; Dan Hill Boligao Marquez, 27, taga Sitio Puso; ug Jonathan Benliran Gabiana, 45, taga Sitio Camparbille.

Nakuha gikan kanila ang duha ka mga sunoy nga bihag, lakip na ang kwarta nga pusta nga mobalor og P800.

Nakadawat og tawag sa telepono ang Labangon Police Station labot sa nagpatigbakay sa Barangay Buhisan.

Dali nila kining girespondedihan uban ang Regional Special Operations Group-Central Visayas.

Sa dihang duol na ang mga pulis, nakabantay ang pipila ka mga tawo, naalibwag kini sa pagpanagan, apan ang upat ilang naabtan ug nadakpan.

Kalapasan sa Presidential Decree 1602 kun illegal gambling ug sa Section 9 paragraph (d) sa Republic Act 11332 kun Mandatory Reporting of Notifiable Diseases and Health Events of Public Health Concern Act taliwa sa pagpatuman sa enhanced community quarantine (ECQ) tungod sa hulga sa coronavirus disease 2019 (Covid-19).

Niadto sab sa Sabado sa hapon, Mayo 23, 2020, 15 ka mga tawo ang nadakpan sa Lapu-Lapu City Police Office (LCPO) nga illegal nga nagtigbakay sa sityo Tungdon, Barangay Basak, Lapu-Lapu City.

Ang mga tawo usab sa dapit ang nitaho sa LCPO kay gisabaan na sila sa sininggitay sa mga sugarol. (AYB)


Source: Sun.Star Superbalita (https://www.sunstar.com.ph/article/1857645/Superbalita-Cebu/Balita/4-nadakpan-sa-tigbakay-sa-Buhisan?ref=rss&format=simple&link=link)

No comments