Recent Posts

Breaking News

4 ka taga Ormoc gikuha; mga stranded moabot


ORMOC City, Leyte - Gikuha na sa lokal nga kagamhanan sa Ormoc City ang upat niini ka residente nga natanggong sa Palo, Leyte gumikan sa isyu sa saktong koordinasyon.

Si Ormoc City Mayor Richard Gomez nagpadala og suwat sa opisina ni Executive Secretary Salvador Medialdea, chairperson sa Balik Probinsya, Bagong Pag-asa Council.

Ang suwat ni Gomez pinetsahan og May 21, 2020.

Nianang buntag sa Mayo 21 lang sila gipahibawo sa nagsingabot nga upat ka tawo.

Dugang sa mayor, sa samang adlaw lang sab sila gipahibawo nga dunay unom ka taga Ormoc ang apil sa Balik Probinsya Program.

Nasayran nga bag-o lang usab nakadawat og email ang LGU sa listahan sa mga moabot.

Matod ni Gomez, apiki kaayo sila gipahibawo nga unta dunay kamanduan (IATF Order No. 2020-02) ang National Inter Agency Task Force (NIATF) nga dapat mapahibawo ang LGU Ormoc tulo ka adlaw sa dili pa ang pagbiyahe.

Nakurat usab si Gomez sa dihang gipahibawo siya nga ang maong kamanduan sa IATF lahi sab sa kamanduan sa Balik Probinsya Program.

Apan giklaro sa mayor nga wala pa usab makadawat og guidelines sa Balik Probinsya Program ang LGU Ormoc.

"In the absence of any such guideline, I must insist that the NTF Against Covid-19 Order No. 2020-02 be observed," matod sa mayor

Sumala niini, dapat dunay saktong koordinasyon sa LGU Ormoc ang pagpauli sa taga Ormoc kay duna sab protocols ang dakbayan nga dapat sundon.

"For another and more importantly, proper coordination as espoused in the NTF Against Covid-19 Order No. 2020-02 is more accord with the principles of decency and courtesy, and allows the LGUs to exercise their autonomy towards the unified, cohesive and orderly implementation of the national policy to address Covid-19, as stated in the Bayanihan To Heal As One Actm," pasabot sa mayor

Buot niya nga dapat dunay igo nga panahon ug koordinasyon sa pag-abot sa taga Ormoc aron mas ilang mapangandaman ang tanan nga proseso sa pagdawat sa mga stranded.

Bisan sa kaapiki, gipaasikaso ni Gomez ang pag-validate sa identity ug pinuy-anan sa unom ug ubang mga impormasyon nga gikinahanglan sa dili pa dawaton.

Nasayran nga taga Ormoc gyud kini ug gikuha dayon sila sa LGU Ormoc ug gidala diritso sa Ormoc City Medical Society Building alang sa profiling ug dad-on sa Isolation Center sa Dolores.

Sa unom nga nakalista, upat pa ang niabot, usa niini taga Boroc, taga Tambulilid, taga Ipil ug Bayog.

Matod ni Gomez, walay problema ang pagdawat sa mga taga Ormoc nga na- stranded apan kinahanglan lang ang saktong koordinasyon.

Nangandam

Samtang, nangandam na ang Ormoc ug mga silingan niini nga lungsod alang sa pagpauli sa mga stranded sa laing lugar.

Duha ka mga meeting ang gipahigayon sa Ormoc City Hall diin nitambong ang nagkadaiyang mayor sa Leyte, Biliran ug Southern Leyte.

Matod ni City Councilor Nolito Quilang, una nga nasabutan nga ang pantalan lang sa Ormoc ang ablihan.

Diin ang mga pasahero para sa lain nga lugar sugaton na lang sa service vehicle sa munisipyo.

Apan ang Philippine Ports Authority (PPA) nisugyot nga tanan nga pantalan ang ablihan aron dili magtapok sa Ormoc.

Nadesisyonan sa mga mayor nga catchment approach ang ilang buhaton.

Ang mga pasahero nga manguli sa San Isidro, Tabango, Villaba, Isabel ug Merida adto modunggo sa pantalan sa Palompon, Leyte.

Ang mga pasahero nga manguli sa Ormoc, Kananga ug Albuera modunggo sa pantalan sa Ormoc.

Ug ang mga taga Mahaplag, Inopacan, Hindang, Hilongos ug Baybay posible sa Baybay ug Hilongos nga pantalan modunggo.

Pananglitan sa pantalan sa Ormoc, ang Kananga ug Albuera magpadala lang og service vehicle alang sa ilang mga residente aron mosugat.

Tanan nga mga pasahero dapat moagi sa istrikto nga patakaran sama sa pag-rapid test ug i-diritso dayun sa isolation centers.

Ang Ormoc naay 699 ka housing units sa National Housing Authority sa Barangay Dolores nga temporaryong gamiton isip isolation center.

Ang gidagdahanon sa pasahero nga pasakyon magdepende sab sa kapasidad sa isolation center sa matag lungsod.

Maghimo usab og memorandum of agreement ang matag lokal nga kagamhanan ug ang shipping lines.

Usa sa gihisgutan nga dili moisyu og ticket ang shipping lines kon walay mapresentar nga Certificate o Letter of Acceptance ang pasahero gikan sa LGU.

Mamahimo ra kini i-send pinaagi sa email o Messenger ug maoy ipakita sa shipping company inig lukat sa ticket.

Nasabutan usab nga dili pun-on sa pasahero ang matag barko o dili sundon ang full capacity.

Gisiguro hinuon sa shipping lines nga bisan og dili sundon ang full capacity, walay mahitabo nga pagsaka sa pletihan.

Pero gusto lang sa shipping lines nga naa sa 50 porsiyento ang pasahero aron makabawi sab sila sa ilang gasto.

I-finalize pa sa mga LGU ug shipping lines ang ilang kasabutan sa dili pa kini ipatuman. (JKDP)


Source: Sun.Star Superbalita (https://www.sunstar.com.ph/article/1857584/Superbalita-Cebu/Balita/4-ka-taga-Ormoc-gikuha-mga-stranded-moabot?ref=rss&format=simple&link=link)

No comments