Recent Posts

Breaking News

3,000 ka vendors, trabahante sa Agdao market i-rapid test


GIBANA-BANA nga 3,000 ka mga manindahay ug trabahante sa kinsa apektado sa wa pay tataw nga pagsira sa Agdao Public Market mopailawom og pagsusi sugod karong adlawa, Mayo 25.

Sa advisory nga gi-post sa lokal nga kagamhanan sa ilang Facebook, ang merkado temporaryong mohunong sa ilang operasyon sugod niadtong Sabado, Mayo 23.

"The Agdao Public Market will be indefinitely closed beginning 5 p.m., May 23, 2020. The City Economic Enterprise shall create the master list for vendors to be given assistance by the City Social Welfare and Development Office (CSWDO)," subay sa advisory.

Si Maribeth Lumactod, Davao City Economic Enterprise chief, nagsulti sa SunStar Davao, kagahapon, Mayo 24, nga ang merkado gisira aron nga hatagan og dalan ang pag-disinfection palengke ug pagsusi sa tanang manindahay ug trabahante sa maong dapit.

Hangtud nga ang tanan di masusi, di ibalik ang operasyon sa merkado. Kini kabahin sa ilang "precautionary measures" aron nga malikayan ang "massive contamination" sa mga trabahante ug mga miadto sa palengke.

Gisulti ni Lumactod nga sugdan nila ang rapid diagnostic test (RPD) ngadto sa mga manindahay ug trabahante sugod sa Mayo 25. Gitataw niini nga mag-implementar sila og "scheduling". Duna lay mga pipila ka mga trabahante sa merkado ang susihon sa usa ka adlaw aron nga malikayan ang pagdasok ug mamentinar gihapon ang social distancing.

Ang pagsusi himuon mismo sa Agdao Public Market.

Gitakda untang ablihan ang merkado sa Hunyo 1, apan ilang gipahibawo ang "indefinite" nga pagbukas aron mahatagan og dakong higayon ang pagsusi kon di mahuman sa maong adlaw.

Gipasalig sab sa buhatan sa mayor pinaagi sa CSWDO nga maapektuhan nga mga vendors ug trabahante sa palengke tabangan.

Sayo niini, ang Department of Health (DOH) nagtaho sa nagkataas nga ihap sa nataptan nga mga tawo sa Covid-19 sa Barangay Leon Garcia Sr., kon diin duol nag sa Agdao Public Market. (Juliet C. Revita)


Source: Sun.Star Superbalita (https://www.sunstar.com.ph/article/1857601/Superbalita-Davao/Balita/3000-ka-vendors-trabahante-sa-Agdao-market-i-rapid-test?ref=rss&format=simple&link=link)

No comments