Recent Posts

Breaking News

3 nasikop tungod sa gidiling druga


USA ka babaye ug duha ka mga lalake ang nasikop sa mga barangay tanod sa managlahing barangay sa dakbayan sa Sugbo niadtong Miyerkules sa gabii, Mayo 20, tungod sa pagdala og shabu ug paghingos og rugby.

Unang nadakpan si Nelly Flor Del Castillo, 26, ug molupyo sa Sityo Pepang, Barangay Tejero.

Matud ni PSMSgt. Erasmo Rosel Jr., imbestigador sa Waterfront Police Station, ang tanod nga si Michael Villanueva nagbantay sa enhanced community quarantine (ECQ) checkpoint sa sityo ug niabot si Del Castillo.

Dihang gipangutana kon unsa ang iyang gikumot, dughang ni Rosel, wala na matago niini nga usa ka pakete sa shabu ang iyang dala busa gidakop.

Si Del Castillo niangkon nga igo lang kini gisugo sa iyang amiga bugti sa P50 suhol.

Ang dinakpan kanhi waitress sa usa ka bar.

Samtang, laing duha ka mga lalake ang nadakpan usab sa mga nag patrolya nga barangay tanod sa Barangay San Roque sa Cebu South Coastal Road sa South Road Properties (SRP).

Giila ni Rosel ang mga nadakpan nga sila Gregorio Barbitso, 50, ug Raymond Cirio, 24, pulos molupyo sa sa Barangay Ermita.

Ang duha nasakpan sa grupo nila San Roque Barangay Tanod Rene Kilat ug kauban samtang nagpatrolya dinha sa Baywalk sa SRP. Naaktohan nga naghingos sa rugby.

Giangkon usab ni Barbitso nga giundangan nalang ang shabu tungod kay wala nay ikapalit hinungdan nga nag antos sa pagsinghut sa rugby.

Si Del Castillo mag-atubang og kaso nga kalapasan paghupot og shabu ug ang duha ka mga lalake pasakaan usab og tukmang kaso sa paghingos og rugby. (BBT)


Source: Sun.Star Superbalita (https://www.sunstar.com.ph/article/1857253/Superbalita-Cebu/Balita/3-nasikop-tungod-sa-gidiling-druga?ref=rss&format=simple&link=link)

No comments