Recent Posts

Breaking News

3 kaso sa Covid-19 natala sa Leyte


LEYTE -- Tulo ka kumpiradong kaso sa coronavirus disease (Covid-19) ang natala sa lalawigan sa Leyte.

Ang duha ka pasyente nakaapil sa Balik Probinsya Program samtang ang usa ka pasyente usa ka overseas Filipino worker (OFW).

Huwebes, Mayo 28, 2020, gianunsyo sa Department of Health (DOH) Eastern Visayas ang duha ka kompirmadong kaso sa Covid-19 sa Leyte.

Usa sa Baybay City ug usa sa Tanauan Leyte.

Sa Baybay City, ang pasyente usa ka 28 anyos nga lalake nga nisakay og bus gikan sa kaulohan ug niabot niadtong Mayo 21 sa Palo, Leyte.

Ang usa ka pasyente gikan naman sa Tanauan, Leyte, usa ka 26 anyos nga lalake nga nakaapil usab sa Balik Probinsya Program.

Biyernes sa hapon, Mayo 29, gikompirmar usab sa DOH-Eastern Visayas nga nakatala og usa ka kompirmadong kaso sa Covid-19 ang Hilongos, Leyte.

Ang pasyente usa ka 31-anyos nga lalake, usa ka OFW nga nagtrabaho sa cruise ship ug nisakay og eroplano gikan Manila ug niabot sa Tacloban sa miaging petsa 25.

Asymptomatic ang pasyente ug kasamtangan nga gi-isolate sa Hilongos, Leyte Isolation Center.

Gi-isolate na usab ang taga Baybay ug Tanauan ug nagpadayun ang contact tracing.

Sa miaging adlaw, nasagmuyo si Ormoc City Mayor Richard Gomez sa pipila ka national government agency gumikan sa kalit nga pagpauli sa mga OFW ug Locally Stranded Individual sa Leyte.

Matod sa mayor nga walay saktong koordinasyon ug impormasyon nga gihatag ang national government sa pagpauli.

"Hindi po kami nagmamarunong at hindi po ito contest ng pagalingan. Trabaho lang po. Kung nananatili kaming Covid-negative it is not for personal glory because at the core of every effort we put out there is the commitment to protect and save lives of our people. Yun lang ho yung goal," matod ni Gomez.

Tuyo ni Gomez nga ma-verify ang usa nila kon taga Ormoc ba gyud ang nanguli ug dunay bay mga papeles ug niagi naba og test.

Base sa kamanduan sa Inter-Agency Task Force ug Department of the Interior and Local Government, dapat pahibaw-on ang LGU tulo ka adlaw sa una pa ang pag-uli. (JKDP)


Source: Sun.Star Superbalita (https://www.sunstar.com.ph/article/1858223/Superbalita-Cebu/Balita/3-kaso-sa-coronavirus-disease-2019-natala-sa-Leyte?ref=rss&format=simple&link=link)

No comments