Recent Posts

Breaking News

3 ka tawo gipamatay


COTABATO CITY -- Dumot sa pamilya ang gilantaw nga motibo sa mga awtoridad sa pagpamanhig alas 12:15 sa udto niadtong adlaw nga Dominggo didto sa probinsya sa Maguindanao.

Giila ang mga napatay nga sila Rassid Guiaman, 35 anyos; Ustadz Abdulgani, 37; ug usa ka alyas Amir, pulos molupyo sa Barangay Tuka, Mamasapano, Maguindanao.

Sumala kang Maguindanao Police Provincial Director Arnold Santiago nga samtang sakay ang mga biktima sa usa ka motorsiklo gikan sa ilang balay paingon sa Datu Piang, apan pag-abot nila sa Sitio Kurungan, Barangay Sambulawan Datu Salibo, kalit lamang silang gi-atngan sa mga armadong mga tawo ug gipamusil gamit ang kalibre .45 nga pistola.

Abtik sab nga miikyas ang mga namusil nga midagan lamang paingon sa suok nga dapit sa Datu Salibo unya misakay sa bangka subay sa sapa.

Patay gilayon ang mga biktima nga naigo sa ilang ulo, likod ug dughan nga parte sa ilang kalawasan.

Pulos naka-face mask ang mga suspetsado ug wala sab sila mamay-ungan sa mga sibilyan nga nakakita sa hitabo.

Sa kasamtangan, dunay mga grupo na o indibidwal nga mga tawo nga gi-imbestigahan sa kapulisan sa Datu Salibo, Maguindanao labot sa hitabo. (Edgar Fuerzas)


Source: Sun.Star Superbalita (https://www.sunstar.com.ph/article/1857673/Superbalita-Davao/Balita/3-ka-tawo-gipamatay?ref=rss&format=simple&link=link)

No comments