Recent Posts

Breaking News

2 ka private compounds sa Minglanilla lockdown


DUHA ka mga pribadong compound sa lungsod sa Minglanilla ang gipa-lockdown sa lokal nga kagamhanan human ang mga paryente sa usa ka kanhi dunay Covid-19, nagpositibo usab sa virus.

Si Minglanilla Mayor Elanito Peña nisaysay nga ilang gilugway ang lockdown sa Nacau ug Heramil compounds sa Sitio Lipata sa Barrio Linao sukad niadtong Sabado, Mayo 23.

Saysay ni Peña nga human nahibaw-an nga positibo ang ikaupat na pasyente sa maong munisipalidad, ila dayon gikuhaan og swab test ang mga kaliwat nga nibisita ug nikuyog sa paglubong niini diin ilang 11 niini ang nagpositibo.

"Mostly relatives na niya diha. Mura nana ug na epicenter diha kanang lugara," matod ni Pena.

Ang ikaupat nga pasyente mao ang 38 anyos nga babaye diin adunay stage 4 Colon Cancer ug namatay niadtong Mayo 9, 2020.

Dungag niya nga tanan pasyente gipangbalhin na sa ilang pasilidad ug puros mga asymptomatic.

Padayon na usab ang contact tracing sa mga nahimamat sa maong 11 nga bag-ong kaso diin uban niini gipanglain na sa ilang barangay isolation center (BIC).

Ang mga direkta nga kontak sa maong mga nagpositibong pasyente kuhaan usab ug swab test.

Sigon usab ni Peña nga ila na gi-disinfect ang maong lugar.

Aduna nay 17 ka mga kaso ang munisipalidad diin usa ang patay ug usa ang nakarekober. (JCT)


Source: Sun.Star Superbalita (https://www.sunstar.com.ph/article/1857702/Superbalita-Cebu/Balita/2-ka-private-compounds-sa-Minglanilla-lockdown?ref=rss&format=simple&link=link)

No comments