Recent Posts

Breaking News

2 ka piniriso gi-Covid; police station lockdown


TALIWA sa hugot nga pagpatuman sa enhanced community quarantine (ECQ) tungod sa hulga sa coronavirus disease (Covid-19), ang pwersa sa kapulisan sa Dakbayan sa Sugbo natibhangan.

Kini human nga gi-lockdown ang Sawang Calero Police Station sa Cebu City Police Office (CCPO) tungod sa pagka positibo sa Covid-19 sa duha ka mga dinakpan sa illegal drugs.

Tungod niini, ang 54 sa 58 ka mga pulis sa mao nga estasyon ipaubos sa 14 ka adlaw nga quarantine.

Ipaubos usab sila sa swab test.

Tungod sa hitabo, ang buhatan di magamit, apan anaa ang Mobile Patrol Group (MPG) nga mopatrolya sa walo ka mga barangay nga ubos sa ilang area of jurisdiction.

Di lang kay ang Sawang Calero police lang ang naproblema karon.

Dunay usa ka pulis nga usa sa mga nagbantay sa border points sa Barangay Luz nga positibo sa Covid-19.

Gilahi na ang mao nga pulis nga nagranggo og corporal sa tunghaan sa Barangay Mabolo. Usa siya sa 40 ka mga pulis nga gi-swab test kay nagbantay sa Luz nga usa sa mga barangay sa Cebu City nga taas og mga kaso sa Covid-19.

Siya ang labing unang pulis sa Central Visayas nga dunay Covid-19.

Matod ni Police Brigadier General Albert Ignatius Ferro, hepe sa Police Regional Office 7, nga sakop sa Regional Mobile Force Battalion 7 ang pulis.

“That personnel is having a good health condition and hopefully after 14 days of quarantine, will have him undergo swab test and we pray and hope, na mag negative na ang iyang results,” matod ni Ferro.

Giatiman na ang maong pulis sa mga doktor ug gihatagan nag tambal lakip na mga bitamina aron molig-on ang iyang lawa. Samtang nimando na usab si Ferro nga ipaubos sa isolation ang 54 ka mga pulis sa Sawang Calero police station.

Apil na niini ang upat ka non-uniformed personnel (NUP).

Magpadayon sila sa ilang trabaho sa sulod sa police station, apan gidid-an lang una sila nga makapauli sa ilang tagsa-tagsa ka mga balay.

Si Police Colonel Josefino Ligan, officer-in-charge sa CCPO, sa iyang bahin nagkanayon nga samtang naka-isolate ang iyang mga personnel ang kasamtangan nga motubag kon adunay alarma mao lang una ang MPG.

Gikuhaan na usab og swab sample ang 38 ka mga piniriso sa Station 6 aron mahibaw-an kon aduna bay natakdan kanila.

Ang duha ka mga piniriso toa na sa Bureau of Jail Management and Penology (BJMP) isolation facility.

Quarantine

Gihangop ni Major Eduard Sanchez, hepe sa Sawang Calero, ang lakang ni Ferro, nga ipaubos sa 14 ka adlaw nga quarantine.

Matod niya nga andam sila nga mopailawom sa swab test.

Upat ra sa iyang mga sakop nga naa nangadestino sa barangay ang wa maapil kay sukad nag-ECQ, naa ra kini sa gawas.

"Ang kahadlok sa Covid-19 naa na siya pirmi. Pero trabaho namo isip mga frontliner sa pag-abag sa goberno, pagbantay sa katawhan. Mopadayon mi sa among naandan gimbuhaton,"sumala pa Sanchez. (AYB, GPL, BBT)


Source: Sun.Star Superbalita (https://www.sunstar.com.ph/article/1855376/Superbalita-Cebu/Balita/2-ka-piniriso-gi-Covid-police-station-lockdown?ref=rss&format=simple&link=link)

No comments