Recent Posts

Breaking News

2 ka magsuon sakay sa ambulansya, nakalusot


DUHA ka mga magsuon nga taga dakbayan sa Lapu-Lapu nakalusot sa mga checkpoint sa kalungsoran sa habagatang Sugbo hangtod na sa lungsod Pinamungajan sa Martes, Mayo 5, 2020 sakay sa usa ka ambulansya sa kagamhanan nga way koordinasyon sa kapulisan sa Probinsya sa Sugbo.

Sa pakisusi sa Superbalita Cebu, ang ambulansya giingong iya sa Barangay Basak, Dakbayan sa Lapu-Lapu, apan ang kapitan wa pa motubag sa pagsuwat ning taho.

Ang ambulansya wa gi-hold, nakauli ra sa siyudad.

Tungod sa hitabo, ang hepe sa Cebu Police Provincial Office (CPPO) nag-imbestigar na nganong nakalusot kini sa mga border checkpoint.

Ang magsuon gipaubos na sa 14 ka adlaw nga quarantine ug i-swab test aron pagtino wa ba silay novel coronavirus, kagaw nga nagdala sa Covid-19.

Sa nakuha nga impormasyon ni Police Colonel Roderick Mariano, direktor sa Cebu Police Provincial Office (CPPO), ang magsuon nagpahatod sa ambulansya aron moipon sa ilang inahan sa Barangay Sambagon. Usa sa mga magsuon giingong dunay deperensya sa pangisip.

“Ang gusto kong malaman doon kanino nag clear nang ambulansya ng Lapu-Lapu? why is it na hindi man lang sila nakipag-coordinate at ginamit yung ambulansya?” sigun ni Mariano.

Pasabot ni Mariano nga sa ingon niini nga sitwasyon, diin ang tibuok probinsya gipaubos sa enhanced community quarantine (ECQ), kinahanglan magpahibawo sila nga adunay mosulod nga taga laing lugar.

DI SA LAPU-LAPU

Giklaro ni Lapu-Lapu City Mayor Junard Chan nga dili sa city government o city health ang ambulansiya nga na-intercept sa lungsod sa Pinamungajan, Sugbo.

Way kasayuran ang mayor sa maong hitabo, sulti niya sa Superbalita Cebu..

“Dili to sa city, sa Basak to. Dapat unta ana naa gyud untay coordination,” matod pa ni Chan kinsa nasurprisa pagpahibawo kaniya sa Superbalita Cebu.

Iyang giklaro nga ang naandang protocol mao nga ang City Disaster Risk Reduction Management ingon man ang City Health maoy gitahasan sa higayon nga adunay himuong pag-transport gawas sa dakbayan. Tungod niini, ipasusi ni Chan ang Barangay Basak ingon man si Kapitan Isabelito Darnayla. (AYB, FVQ)


Source: Sun.Star Superbalita (https://www.sunstar.com.ph/article/1855240/Superbalita-Cebu/Balita/2-ka-magsuon-sakay-sa-ambulansya-nakalusot?ref=rss&format=simple&link=link)

No comments