Recent Posts

Breaking News

2 ka BIFF suspek sa pagpamomba dakpan


COTABATO CITY -- Nasignit sa mga awtoridad ang duha ka miyembro sa Dawlah Islamiya Terror Group sa Bangsamoro Islamic Freedom Fighters (BIFF) alas tres sa hapon niadtong adlaw nga Huwebes, Mayo 7, sa Maguindanao.

Giila ang mga suspek nga sila Sultan Baguinda Guialil ug Mohammad Baguindanao Candado nga mga sakop ni Kumander Kagui Bayan sa BIFF.

Sumala kang Maguindanao Police Provincial Director Colonel Arnold Santiago nga nakadawat sila og impormasyon gikan sa mga sibilyan nga nasiplatan ang mga suspek sa Barangay Poblacion, Datu Piang, Maguindanao.

Abtik nga nagpahigayon og operasyon ang Datu Piang police, Maguindanao Police Provincial Office uban ang militar diin gidakop sila Guialil ug Candado.

Narekober sa mga suspek ang duha ka kalibre.45 nga pistola, duha ka granada, mga bala ug magazine.

Gikanayon ni Colonel Arnold Santiago nga sila Guialil ug Candado maoy gitudlo nga suspek sa pagpang-itsa og granada duol sa Datu Piang Municipal Police Station ug nakalabay nga pagpabusikad sa granada atbang sa simbahan sa katoliko sa maong dapit.

Gi-angkon sab sa mga suspek nga sila gisugo ni Kumander Kagui Bayan isip kabahin sa ilang test mission.

Sa kasamtangan ang mga suspek ang gibalhog na sa custodial facility sa Datu Piang Municipal Police Station ug gitakda nga pasakaan sa tukmang kaso didto sa korte. (Edgar Fuerzas)


Source: Sun.Star Superbalita (https://www.sunstar.com.ph/article/1855605/Superbalita-Davao/Balita/2-ka-BIFF-suspek-sa-pagpamomba-dakpan?ref=rss&format=simple&link=link)

No comments