Recent Posts

Breaking News

164 naka recover sa Cebu City; labing daghan sa usa ka adlaw


NATALA sa Cebu City Government ang labing daghan nga recovery sa coronavirus disease (Covid-19) sa usa ka adlaw sukad sa nakalabay nga mga buwan dihang nisugod paghugpa ang sakit sa Dakbayan sa Sugbo.

Si City Attorney Rey Gealon, tigpamaba ni Mayor Edgardo Labella ,nipahibawo nga adunay 164 ka mga pasyente nga asymptomatic Covid positive, apan negative na ang resulta sa ilang swab test nga nigawas sa Mayo 27, 2020. Ang Barangay Suba maoy nakarehistro og labing daghan og recoveries kun lab negative nga niabot og 114.

Gisundan kini sa Barangay Bacayan (33), Mambaling (15) ug duha sa barangay Sambag 2.

Kagahapon, ang 114 ka mga pasyente sa Barangay Suba nakagawas na sa barangay isolation center (BIC). Si City Administrator Floro Casas Jr., nihangop sa maayong balita sanglit nagpasabot kini nga naghinayhinay na og kaalim ang mga pasyente ug makabalik na sa ilang tagsa-tagsa ka mga pamilya.

Sa kinatibuk-an, sa Cebu City niabot na og 394 ka recoveries sa Covid. Sila pulos gipahimutang sa mga BIC.

Samtang nakadiskobre usab ang City Health Department og dugang 21 ka mga bag-ong kaso sa Covid kagahapon.

Kini nihatod ngadto sa 2,013 ka mga Covid-19 positive sa Dakbayan sa Sugbo hangtod kagahapon. Moabot na usab og 25 ang nangamatay gumikan sa maong sakit sa dakbayan. (PAC)


Source: Sun.Star Superbalita (https://www.sunstar.com.ph/article/1858028/Superbalita-Cebu/Balita/164-naka-recover-sa-Cebu-City-labing-daghan-sa-usa-ka-adlaw?ref=rss&format=simple&link=link)

No comments