Recent Posts

Breaking News

100,000 food packs sa 71 ka LGUs sa Central Visayas


NIABOT na sa 99,256 ka mga family food packs ang natunol sa Department of Social Welfare and Development (DSWD)-Central Visayas sa 71 ka local government units (LGUs) lukop Central Visayas.

Ang maong mga family food packs nagkantidad og sumatotal P39,100,378.78.

Gipanghatag kini sa DSWD-Central Visayas alang sa mga tinun-an ug mga trabahante nga kasamtangan nga wala'y trabaho tungod sa krisis sa Covid-19.

Matag family food pack aduna kini'y unom ka kilo nga bugas, upat ka de lata nga sardinas, upat ka de lata nga karne ug unom ka sachet sa 3-in-1 nga kape diin mamahimo kini nga kunsomo sa pamilya nga aduna'y lima ka miyembro sulod sa duha ka adlaw.

Padayon hinuon ang pag-repack sa warehouse sa DSWD-Central Visayas sa mga lalawigan sa Sugbo, Bohol ug Negros Oriental.

Lakip sa kaabag sa DSWD-Central Visayas sa pagpangtunol sa family food packs ang Philippine National Police, Philippine Coast Guard, Armed Forces of the Philippines, Bohol Island State University ug Philippine Maritime Institute pinaagi sa ilahang Reserve Officer Training Corps ug Sangguniang Kabataan sa Dauis, Bohol.

Sa pagkakaron aduna'y pundo nga 27,051 ka family food packs ang DSWD-Central Visayas.

Mapasalamaton usab ang DSWD sa mga donasyon nga nadawat nila sa ilahang ahensiya nga nikantidad og P76,170, diin naglakip kini sa mga pagkaon gikan sa McDonalds, Starbucks, Waterfront Cebu City Hotel and Casino, Jollibee ug Miggab Eatery.

Samtang nitunol usab og alcohol ang IPI Foundation, Inc. ug thermal scanners, face masks, alcohol gikan sa Tzu Chi Foundation. (HBL)


Source: Sun.Star Superbalita (https://www.sunstar.com.ph/article/1857315/Superbalita-Cebu/Balita/100000-food-packs-sa-71-ka-local-government-units-sa-Central-Visayas?ref=rss&format=simple&link=link)

No comments