Recent Posts

Breaking News

1,000 ma-test sa SPMC matag adlaw sa Covid-19


DUNA na karoy kapasidad ang Southern Philippines Medical Center (SPMC) nga maka-test og kasarangan (average) nga 1,000 samples matag adlaw human nga ang ihap sa real-time reverse transcription-polymerase chain reaction (RT-PCR) machines sa ilang ospital miabot na og upat.

Sa paghinabi niadtong Lunes, Mayo 25, uban ni SPMC medical professional staff chief Dr. Ricardo Audan, gibutyag niini nga sa primiro, duna lang silay duha ka RT-PCR machines sa ilang laboratoryo apan niadtong niaging semana, lain pang duha ka RT-PCR machines, niabot na ang gidonar sa business conglomerate San Miguel Corporation (SMC).

Uban sa duha ka RT-PCR machines nga giingong "high-throughput automated RNA extraction system," gamay na lang nga panahon ang magugol ug wala na kaayo manginahanglan og "human intervention."

"Di ba ang testing namo naga 150 to 300 the most so karon times 3, mga [around] 1,000 because of the automated extractor kay katong duha ka original, mano-mano man mi," tug-an ni Audan.

Tungod niining bag-ong testing nga ekipo, ang kapasidad ug ka-episente sa SPMC sa mass tests mokusog kay daghan pa nga mga gisuspetsahan ug probable nga pasyente sa coronavirus disease (Covid-19) masusi.

Ang pagtaas sa "testing" makatabang sab sa pagdeterminar sa gidak-on sa "contagion" ug magpakubos sa risgo sa transmisyon.

Apan matud ni Audan nga maong mga makina wa pa gyud magamit kay ang mga enhenyero gikan sa SMC gipadala pa aron nga mag-instolar sa makina.

Sulod ning semanahona, gilauman sa SPMC nga ang maong mga makina magamit na.

"This is a big help because this is the gold standard compared to rapid test kay kung mag rapid test pa, anti-bodies raman siya tan-awon," tin-aw niya.

Hinuon, ang lokal nga kagamhanan sa Davao nagpahugot na sa ilang "community case finding" gamit sa rapid diagnostic test (RDT), apan ang resulta nga makuha, moagi gihapon sa RT-PCR machine alang sa confirmatory test.

Gikan Marso 21 hangtud Mayo 24, ang SPMC duna na karoy natala nga kinatibuk-ang 234 Covid-19 patients uban sa 109 nga nakarekober ug 25 patay.

Apan ang SPMC nangandam alang sa gilaumang pagsulbong sa mga kaso sa Covid-19 human nga ang siyudad nibalhin sa enhanced community quarantine ngado sa general community quarantine, paglugak sa pipila ka mga restriksiyon ug nagtugot sa lihok sa mga tawo, ilabi na kadtong gikinahanglan kaayo.


Source: Sun.Star Superbalita (https://www.sunstar.com.ph/article/1857679/Superbalita-Davao/Balita/1000-ma-test-sa-SPMC-matag-adlaw-sa-Covid-19?ref=rss&format=simple&link=link)

No comments