Recent Posts

Breaking News

Sikyo wa kadawat og hinabang, namaligya og shabu, nasikop

USA ka security guard ang namaligya nalang og shabu human naapektuhi sa enhance community quarantine (ECQ).

Si Bernard Almencion, 59, taga sitio Alseca, Barangay Calamba, dakbayan sa Sugbu, ang nasikop uban sa iyang silingan nga si Ruselo Atilano, 35, ug Michael Salonga, 28, ulitawo alias "Pare" taga Sawang Calero.

Si Major Eduard Sanchez, hepe sa Police Station 6 sa Sawang Calero mitug-an sa Superbalita Cebu nga ang tulo nadakpan sa buy bust operation mga alas 11:00 ang takna kagahapon sa buntag sa Block 7, sa nahisgutang barangay. Target sa kapulisan si Salonga kinsa maoy ilang gipalitan og usa ka putos nga shabu balor P200 pesos. Nakuhaan usab kini og laing 20 pa ka putos nga mobalor og P4 mil pesos.

Atol sa operation, naatolan nga didto usab ang security guard nga si Almencion kuyog ang silingan niini nga si Atilano nga giingong nangumpra usab og shabu. Ang duha nakuhaan og tag duha ka putos.

Sa imbestigasyon, si Almencion mibutyag nga napugos siya sa pagpamaligya og shabu tungod kay wala na siyay income ug wala usab siyay nadawat nga hinabang gikan sa gobiyerno.

Niini nagkasabot siya ug ang iyang silingan apan way suwerte kay naabtan sila sa dimalas.

Gibutyag usab ni Sanchez nga ang mga dinakpan pulos walay ECQ pass apan naabog kini sa Sawang Calero pinaagi sa paglipat-lipat sa mga checkpoints. (GPL)

Source: Sun.Star Superbalita (https://www.sunstar.com.ph/article/1851758/Superbalita-Cebu/Balita/Sikyo-wa-kadawat-og-hinabang-namaligya-og-shabu-nasikop?ref=rss&format=simple&link=link)

No comments