Recent Posts

Breaking News

Na-stranded nga byahero sa Davao del Sur wa gipapauli

BANSALAN, Davao del Sur — Wala gipalusot sa enhanced community quarantine (ECQ) checkpoint ang mokabat kapin kun kulang 50 ka mga byaherong mopauli sa ilang mga lugar didto sa mga probinsya sa North Cotabato, Maguindanao, South Cotabato ug Sultan Kudarat niadtong Dominggo, Abril 5.

Gipangunahan ni Second Davao del Sur Provincial Mobile Force Company Captain Jocyviel Zamora ang paghatag og impormasyon sa mga natanggong nga byahero kalabot sa gipatumang guidelines sa Task Forde (TF) Coronavirus Disease (Covid-19) kung kinsa lamang ang mahimong makabyahe panahon sa ECQ.

Hugot ang gihimong pagbantay sa TF-Covid-19 didto sa ilang checkpoint sa Barangay Kinuskusan, ning lugar.

Matod ni Zamora nga luyo sa pahimangno sa gobyerno nga magpuyo sa panimalay ang katawhan samtang gipatuman ang ECQ sa probinsya sa North Cotabato, Davao del Sur ug uban pang dapit, aduna gihapo'y mga indibidwal nga wa motuman niini.

Hinuon, gitambagan sa opisyal ang matag indibidwal nga mas maayong mopauli na lamang sa ilang mga gigikanang lugar sanglit di gyud sila mahimong makalusot hangtud di mawagtang ang ECQ.

Gidason ni Zamora nga seryoso ang gobyerno sa paagpatuman sa mga nakalatid nga balaod sa ECQ aron di mokatap ang Covid-19 sa uban pang mga dapit.

Misaad hinuon ang matag indibidwal nga motuman ug motabang na sa kampanya batok sa kagaw. (Orlando B. Dinoy)

Source: Sun.Star Superbalita (https://www.sunstar.com.ph/article/1851562/Superbalita-Davao/Balita/Na-stranded-nga-byahero-sa-Davao-del-Sur-wa-gipapauli?ref=rss&format=simple&link=link)

No comments