Recent Posts

Breaking News

Mga health workers gipahinumduman nga red alert

NAGPAHINUMDOM ang kadagkoan sa Northern Mindanao Medical Center (NMMC) sa mga health workers nga naka-red alert karon ang Department of Health (DOH) ug gikinahanglan kaayo ang ilang serbisyo alang sa gobyerno.

Gibutyag ni Dr. Jose Chan, medical director sa NMMC nga normal ang kahadlok labi na karong panahona nga grabe ang pagkaylap sa coronavirus disease (Covid-19) diin gani pipila na ka kinabuhi sa mga doktor ang nakalas tungod sa nahisgutang virus.

"Normal nga naa ng kahadlok bisan karong panahona pero sa ato ng giingon ato ning trabaho, ato ning career nga gisudlan so di ta maka sulti kung unsay maabot nato sa atong pagpanarbaho," matud ni Chan.

Gidugang pa ni Chan nga kinahanglan lang nga andam usab nga managang sa kaugalingon.

"Kay labi na nga nagtrabaho sa hospital so ato lang hinumdoman nga ato gyud ning trabaho. Mahadlok ta pero kinahanglan kabalo pud ta molikay kung kanus-a kinahanglan, " dugang pa.

Gipaniguro usab niini nga dunay mga gihimo ang DOH ug ospital nga buhaton sa mga personahe aron nga dili usab maalanganin ug dili maagrabyado ang gobyerno sama sa pag trabaho gihapon sa kwarenta ka oras (40 hrs) sulod sa usa ka semana. bisan paman pagbawas sa adlaw sa pag trabaho.

Kini tungod na usab kay dili man pwedi nga maka-work from home ang sama kanila og klase nga trabaho labi na karong panahona.

Gani karong panahona bisan nga sobra na sa trabaho apan kung gikinahanglan pa ang imong serbisyo dili mamahimong mobalibad.

"Pero atong hinumdoman nga naka-red alert ta karon sa gobyerno sa Department of Health for that matter which means magtrabaho ka og duna pa gyu'y sobra nga i-trabaho nimo sa gobyerno kung kinahanglan ka ipareport gyud," dugang pa.

Gipasabot usab ni Chan nga ilang gihimo ang tanan alang usab sa kaluwasan sa ilang mga personahe.

Source: Sun.Star Superbalita (https://www.sunstar.com.ph/article/1851504/Superbalita-Cagayan-de-oro/Balita/Mga-health-workers-gipahinumduman-nga-red-alert?ref=rss&format=simple&link=link)

No comments