Recent Posts

Breaking News

Gitigbas habol nga sundang



STA. CRUZ, Davao del Sur -- Gitigbas sa likod sa kaugalingong apo ang iyang lola human maglalis didto sa ilang balay sa Sitio Balalan, Barangay Zone 2, alas 5:30 sa hapon, Miyerkules, Abril 15, 2020.

Apan maayo na lang kay habol nga sundang ang gigamit sa apo, hinungdan nga nakaangkon lang og diyutay nga samad sa likod ang apohan.

Sumala ni Major Crisaldo Gaila, hepe sa Sta. Cruz Municipal Police Station, nga ang biktima nailhang si Verginia Naad Anical, 68, biyuda ug molupyo sa nahigutang barangay.

Nailhan sab ang suspek nga si Jay-Ar Brioso Anical, 21, ulitawo, mag-uuma ug molupyo sa Sitio Loay, Barangay Zone 2 sa maong lungsod.

Gitataw ni Gaila nga nag-away ang mag-apohan gumikan sa baboy nga gipabatnan human nagsabot nga kung manganak na ang anay ilang tungaan ang mga baktin niini.

Apan human nanganak ang anay, dili na ihatag sa apo ang bahin sa iyang apohan, hinungdan nahitabo ang ilang panaglalis ug gitigbas niya kini sa likod nga bahin.

"Buhi ang biktima kay habol man ang sundang, naa lang daplis ang likod," paghulagway ni Gaila sa kahimtang sa lola kinsa anaa na sa maayong kahimtang.

Naglusad na og halapad nga manhunt operation ang kapulisan aron masikop ang misibat nga suspek.



Source: Sun.Star Superbalita (https://www.sunstar.com.ph/article/1852757/Superbalita-Davao/Balita/Gitigbas-habol-nga-sundang?ref=rss&format=simple&link=link)

No comments