Recent Posts

Breaking News

Face shields nadawat sa frontliners



DAVAO DEL NORTE -- Mokabat sa kapin 250 ka mga face shields ang gipanghatag sa The Fraternal Order Of Eagles (Phil. Eagles) sa Asuncion Davao North Eagles Club ngadto sa mga frontliners ning probinsiya.

Ang presidente sa club nga si Allan Basong nagbutyag dihang nahinabi sa Superbalita Davao pinaagi sa selpon nga nahimo nila kini sa tinguha nga makatabang sa mga bayaning frontliners kinsa maoy nanguna sa pakigbisog sa pandemic nga coronavirus disease (Covid-19).

Matud pa nga 13 lang ka mga "kuya" kun mga miyembro sa club ang nakauban sa pagpanghatag sa face shields sanglit ang kadaghanan kanila tua sa mga lagyong dapit. Apan ang matag usa mipaabot sa ilang suporta aron makab-ot ang tinguha sa grupo nga makatabang ning kasamtangang krisis.

Gibutyag nga giadtoan sa Asuncion Davao North Eagles Club (Adnec), sakay sa lima ka mga pribadong sakyanan ang Barangay Pagsabangan kon diin 20 ka mga face shields ang nahatag; Asuncion, 20 usab ka mga face shields; New Corella, 35; Cuambogan, 15; Barangay Libuganon, 15; ug sa Task Force-Tagum anaa sa 86 ka mga face shields ang natunol.

Lakip usab nga giadtoan sa Adnec ang layong lungsod ning probinsiya nga mao ang Talaingod kung diin 20 usab ka mga frontliners ang nahatagan.

Balor sa P13 mil nga kantidad ang gigahin sa grupo alang niini kung diin ang matag-usa kanila mipaabot sa ilang suporta, hinungdan nga nagmalampuson ang inisyatibo. (Dexter T. Visitacion)



Source: Sun.Star Superbalita (https://www.sunstar.com.ph/article/1852755/Superbalita-Davao/Balita/Face-shields-nadawat-sa-frontliners?ref=rss&format=simple&link=link)

No comments