Recent Posts

Breaking News

“Bendita sa Lukay” gipaagi sa social media

GIPANGUNAHAN ni Monsignor Guillermo Afable sa Diocese of Digos ang selebrasyon sa Santos nga Misa alang sa “Bendita sa Lukay” timailhan nga nagsugod na ang Semana Santa alas 8 sa buntag, Dominggo, Abril 5, 2020.

Ang mga magtutuo anaa lamang sa ilang panimalay ug nagunit sa mga lukay dungan sa gihimong bendisyon sa Obispo sulod sa simbahan.

Usa ang deboto nga si Esther Razonable, nga migamit sa iyang Facebook account aron makapaminaw sa mga balaang pulong nga gipadayag ni Afable.

Sa wali ni Afable, gitataw niini nga kinahanglan ang hugot nga pagsalig sa kahitas-an ilabi na sa nasinati karon sa hulga sa coronavirus disease.

“Unsa man gyud ang pinakasakit nga nahiagoman sa Iyaha (Kristo), ang sakit ba sa paglansang sa krus, ang sakit ba sa pag-korona sa tunok, ang sakit ba sa pagbugal-bugal kaniya, ang tubag nianang pangutana mga igsoon anaa diha sa Iyang gisinggit Eli Eli Sabactani, nganong gibiyaan mo ako. Gibati niya nga gibiyaan siya, gibati niya nga gisalikway siya, gibati niya nga wala siya tagda,” pulong ni Afable.

Giawhag ni Afable ang katawhan nga diha sa tagsa-tagsa ka panimalay angayang mahibalik ang mapaubsanon ug mahinulsolon nga pakig-uli sa Diyos ug pagdawat kaniya pagbalik uban sa pagpangayo og pasaylo.

Sayo niini, niabiso ang Simbahang Katoliko alang sa mga molantaw sa Santos nga Misa ug ubang aktibidades sa Simbahan ning panahon sa Semana Santa nga mag-andam og lamesa nga butangan og imahe sa santo ug crucifix ug magdagkot og kandila samtang seryosong maminaw sa balaang pulong.

Gikinahanglan sab nga mag-ilis og tarong sama sa ilang pagsimba sa Simbahan, pawngon ang mga gadget ug angayang di madistorbo sa ilang pagpaminaw sa social media.

Panahon sa pangalawat kinahanglan nga mag-ampo sa "spiritual prayer."

Source: Sun.Star Superbalita (https://www.sunstar.com.ph/article/1851426/Superbalita-Davao/Balita/Bendita-sa-Lukay-gipaagi-sa-social-media?ref=rss&format=simple&link=link)

No comments