Recent Posts

Breaking News

Bayot nanghulga sa pulis, nagpabilin sa prisuhan

HANGTUD ning pagsulat, nagpabilin sa selda sa Labangon Police Station ang bayot nga gidakop niadtong Huwebes, Abril 2, sa dan F. Llamas sa Barangay Punta Princesa, dakbayan sa Sugbo human wala magsul-ob og face mask nunot sa Enhanced Community Quarantine (ECQ) checkpoint ug nagminaldita hinuon dihang gibadlong.

Si PCapt. Jonathan Dela Cerna, hepe sa Labangon Police Station 10, nikompirma nga nasang-at na ang kaso batok sa bayot niadtong Sabado sa buntag, Abril 4 pinaagi sa inquest proceedings ug karon gipaabot nalang ang information gikan sa piskalya aron makapiyansa una samtang magpaabot sa skedyul sa iyang pagtambong sa kaso nga giatubang.

Si Christoper Ygonia, 44, taga dan F.Llamas sa Punta Princesa gipasakaan og kaso kalapasan sa Article 151 sa Revised Penal Code (RPC) ug disobedience in authoity or agent in such person ug Republic Act 11332 subay ba sa Section 9 (Mandatory Reporting of Notifiable Disease and Health Event of Public Health Concern Act).

Diin dinhi nalapas ni Ygonia ang pagsupak sa gipatuman nga kamanduan nga gipatuman sa awtoridad sa gimando ni Cebu City Mayor Edgardo Labella kalabot na sa mandatory nga pag sul-ob og face mask.

Si Ygonia gidakop sa kapulisan sa ECQ Checkpoint tungod sa pagpamahad niini sa usa sa mga pulis nga iyang sagpaon og face mask ang pulis sa iyang pagbalik.

Una nang mirason si Ygonia sa Superbalita Cebu nga iya kadtong nasulti tungod usab sa wala niini maangayi, matod pa, ang pulong sa pulis ngadto kaniya. (BBT)

Source: Sun.Star Superbalita (https://www.sunstar.com.ph/article/1851450/Superbalita-Cebu/Balita/Bayot-nanghulga-sa-pulis-nagpabilin-sa-prisuhan?ref=rss&format=simple&link=link)

No comments