Recent Posts

Breaking News

Ahong: sticker di na kinahanglan sa quarantine pass



PWEDENG walay sticker sa siyudad sa Lapu-Lapu ang Enhanced Community Quarantine (ECQ) pass nga giisyu sa dakbayan.

Kini ang giklaro ni Lapu-Lapu City Mayor Junard “Ahong” Chan human nga nakadawat siya og taho nga adunay daghang ECQ pass holder ang g gipatawag sa mga nagkadaiyang barangay aron tagaan og sticker.

Gibutyag ni Chan nga nahitabo lang nga adunay mga ECQ pass nga kinahanglan butangan og sticker human, matod pa, gipa-laminate na kini daan sa mga tag-iya bisan wala pa mabutangi og control number.

Apan kung aduna nay control number ug silyo sa barangay ang ECQ pass hayan dili na kini kinahanglan og sticker.

Kinahanglan usab adunay pangalan mismo sa tag-iya ang usa ka ECQ pass aron mahimo kining balido.

Duha ka pangalan ang mahimo ibutang sa usa ka ECQ pass apan usa lang ang mahimong makagawas sa panimalay sa higayon nga mangompra ug magpalit.

Matod ni Chan nga ang katong mga ECQ pass nga gipangbutangan ug sticker gikatakda usab nga ilisan sa hingpit sa mga opisyal sa barangay sa higayon nga mang apud-apod na sila sa libreng bugas sa ilang mga konstituwenti.

Apan samtang wala pa kini mahulipi balido pa gihapon kini sa pagkakaron.

Kahinumdoman nga sa milabayng semana daghan ang nasita sa mga sakop sa Lapu-Lapu City Police Office (LCPO) human nga ang ilang ECQ pass walay control numbers.

Nakahatag kini ug kalibog sa kapulisan kun balido ba o dili ang naasoyng mga ECQ pass niadtong tungora. (GCM)



Source: Sun.Star Superbalita (https://www.sunstar.com.ph/article/1852645/Superbalita-Cebu/Balita/Ahong-sticker-di-na-kinahanglan-sa-quarantine-pass?ref=rss&format=simple&link=link)

No comments