Recent Posts

Breaking News

5 nga mieskapo mitahan sa Talisay police



NINGTAHAN na sa Miyerkules alas 11 pasado sa gabii, Abril 15, 2020, ang lima ka mga piniriso nga ning-eskapo gikan sa bilanggoan sa Cebu Police Provincial Office (CCPO) headquarter sa Sudlon, Barangay Lahug, Dakbayan sa Sugbo.

Pito ka mga piniriso ang nakapuga niadtong Martes sa gabii, Abril 14, 2020, apan ang duha nadakpan gilayon.

Ang ningtahan human hangyoa sa ilang mga pamilya mao sila si Lucio Papas Llamedo, Marcelo Geronggay, Edjon Samson Carbantes, Jorsua Orongan Burgos ug Jave Reyes Pongcol.

Si Pongcol nisulti sa Superbalita Cebu nga human sila makaeskapo, nanago sila sa kakahuyan ug kasagbutan sa Nivel Hills, Lahug, pipila lang ka kilometro gikan sa CPPO headquarter.

Tibuok adlaw silang nagtago, bayabas lang nga ilang nakit-an sa dapit ang ilang gikaon.

Wa silay mainom nga tubig, apan ila ning giagwanta aron di sila makit-an og tawo.

Human sila niuyon nga motahan, gipakuha gilayon sila ni Police Major Gerard Ace Pelare, hepe sa Talisay City Police Station.

Ang lima nga gigutom ug giuhaw, gipakaon ug gipainom gilayon ni Pelare pag-abot sa police station.

Si Pongcol nidugang nga napugos sila sa pag-eskapo kay di makatawhanon ang pagtratar sa mga pulis kanila.

Matod niya nga di ihatag gilayon kanila ang mga pagkaon nga ihatod sa ilang pamilya.

Giklaro usab ni Pongcol nga ang bungbong sa bilanggoan duna nay daang bangag nga maoy gihinayhinayan sa pagpadako.

Ang duha ka mga binilanggo nga unang nadakpan maoy giingon niyang nipadako sa lungag, di sila. (BBT)



Source: Sun.Star Superbalita (https://www.sunstar.com.ph/article/1852712/Superbalita-Cebu/Balita/5-nga-mieskapo-mitahan-sa-Talisay-police?ref=rss&format=simple&link=link)

No comments