Recent Posts

Breaking News

20 ka lungsod butangan og bagsakan center

BAYNTE ka mga lungsod ang gilauman nga makapahimos na sa ipahimutang nga bagsakan center sa Kagamhanan sa Lalawigan sa Sugbo nga mobukas sa Lunes, Abril 6, 2020.

Lakip sa mga lungsod nga pasiuna nga buksan sa bagsakan centers mao ang Alcantara, Alcoy, Alegria, Aloguinsan, Badian, Boljoon, Catmon, Ginatilan, Madridejos, Malabuyoc, Pilar, Poro, Ronda, Santander, Samboan, Sogod, Sta. Fe, Tabogon, Tabuelan ug Tudela.

Ang maong tindahan anha ipahimutang sa mga municipal covered courts aron inig pamalit sa mga Sugboanon, matuman gihapon ang social distancing.

Sa bagsakan center, diha maka pamalit og supply ang mga residente sa lugar sama sa utanon, de lata, bugas ug uban pang gikinahanglan.

Ang matag panimalay nga nalakip sa labing nagkinahanglan, maoy unahon paghatag og household pass aron makapamalit.

“For transparency, mobutang ta og dako nga tarpaulin unya sa Sugbo news sad i-post ang tanan nga presyo sa mga supplies,"matod ni Garcia.

Gisiguro sa Lalawigan nga nagtungtong sa ubos nga presyo ang mga palaliton aron nga makapalit ang tanan.

Apan limitado lang ang mapalit sa matag household.

Kon mopalit man gani og bugas, kinahanglan nga matag indibidwal duna lay konsumo nga duha ka kilo sa usa ka semana.

Limitado usab ang gidaghanon sa mapalit nga sardinas, gatas, kamay, asin, mantika ug uban pa.

Ang matag tawo makapalit lang ug 14 ka lata sa sardinas, tulo ka putos sa gatas, duha ka brown sugar nga 250 grams, usa ka baretta sa sabon, duha ka tag 200 ml nga mantika ug tulo ka putos sa sabon nga detergent.

May booklet usab nga tamdan ang City/ Municipal Social Welfare and Development Office (C/MWDO) nga lista sa pamilya nga makapalit.

Kini gituyo aron pagdaginot sa supply aron usab nga ma apod sa tanan. (ANV)

Source: Sun.Star Superbalita (https://www.sunstar.com.ph/article/1851341/Superbalita-Cebu/Balita/20-ka-lungsod-butangan-og-bagsakan-center?ref=rss&format=simple&link=link)

No comments